საქართველოს საგარეო საქმეთა მინისტრმა, დავით ზალკალიანმა, საქართველოში გაეროს
ახლადდანიშნულ რეზიდენტ-კოორდინატორ, საბინ მაქლისთან გაცნობითი ხასიათის შეხვედრა გამართა.

შეხვედრისას მხარეებმა საქართველოსა და გაერო-ს შორის არსებული თანამშრომლობის მიმართულებები განიხილეს.

წლების მანძილზე ნაყოფიერ თანამშრომლობას, მათ შორის, მდგრადი განვითარების მიზნების ნაციონალიზაციის პროცესში გაეროს აქტიურ როლს მაღალი შეფასება მიეცა.

საბინ მაქლიმ შეხვედრისას აღნიშნა, რომ გაეროს რეზიდენტ-კოორდინატორის ოფისი გაზრდილი ძალისხმევით გაუწევს კოორდინაციას საქართველოში აკრედიტებული გაეროს სააგენტოების საქმიანობას, რაც ხელს შეუწყობს საქართველოსა და გაერო-ს შორის თანამშრომლობის კიდევ უფრო გაღრმავებას.

შეხვედრაზე მხარეებმა ისაუბრეს რეგიონში უსაფრთხოების კუთხით არსებულ ვითარებაზე და საერთაშორისო თანამეგობრობის წინაშე მდგარ გამოწვევებზე.

ხაზი გაესვა გაერო-ს მნიშვნელოვან როლს ჟენევის საერთაშორისო მოლაპარაკებების ფორმატში, განსაკუთრებით, კონფლიქტით დაზარალებული მოსახლეობისთვის უსაფრთხოების გაუმჯობესებისა და ჰუმანიტარული პრობლემების გადაჭრის თვალსაზრისით.

შეხვედრის დასასრულს მინისტრმა საბინ მაქლის ახალ თანამდებობაზე წარმატებები უსურვა.

თავის მხრივ, საბინ მაქლიმ მინისტრს მადლობა გადაუხადა და აქტიური თანამშრომლობისთვის მზაობა გამოხატა.