საარჩევნო და პოლიტტექნოლოგიების კვლევის ცენტრის ხელმძღვანელი კახი კახიშვილი მიიჩნევს, რომ „დემოკრატიული მოძრაობა-ერთიანი საქართველოს“ თავმჯდომარემ ნინო ბურჯანაძემ,

სტრატეგიულად სწორი გადაწყვეტილება მიიღო, როდესაც საპარლამენტო არჩევნებში მონაწილეობაზე უარი განაცხადა.

როგორც კახიშვილმა „ნიუსპრესს“ განუცხადა, ამ გადაწყვეტილებით ბურჯანაძემ, უპირველეს ყოვლისა, ოპოზიციურ პარტიებს შორის ხმების გაყოფა აიცილა თავიდან.

„რამდენი ხმაც არ უნდა აეღო ბურჯანაძეს, ის ხმები მხოლოდ ოპოზიციურად განწყობილთა ხმები იქნებოდა, რომელიც „ქართულ ოცნებას“ და სხვა ოპოზიციურ პოლიტიკურ სუბიექტებს დააკლდებოდა და არა „ნაციონალურ მოძრაობას“ - განაცხადა კახიშვილმა და დასძინა, რომ რაც ნაკლები ოპოზიციური პარტია მიიღებს არჩევნებში მონაწილეობას, მით მეტი შესაძლებლობაა, ოპოზიციურად განწყობილთა ხმები სხვადასხვა პოლიტიკურ სუბიექტებზე არ გაიყოს.

„ამ გადაწყვეტილებით ბურჯანაძე საზოგადოების თვალში პოზიტიურ როლში გამოვიდა იმ თვალსაზრისით, რომ არ გახდა ოპოზიციურად განწყობილი ხმების გამხლეჩი. იმ შემთხვევაში, თუ კოალიციამ ვერ შეასრულა ხალხისთვის მიცემული დანაპირები პარლამენტში უმრავლესობით მოსვლასთან დაკავშირებით, ბურჯანაძეს ექნება სათქმელი, რომ ამ მიზნის მიღწევაში „ქართული ოცნებისთვის“ მას ხელი არ შეუშლია“- განაცახდა კახიშვილმა და განმარტა, რომ ამით „დემოკატიული მოძრაობის“ ლიდერს საშუალება ეძლევა, არჩევნების შემდეგ კრიტიკოსის როლში გამოვიდეს.

რაც შეეხება კოალიცია „ქართული ოცნების“ დადებით შეფასებას ბურჯანაძის აღნიშნულ გადაწყვეტილებაზე, კახიშვილი მიიჩნევს, რომ ეს ბუნებრივია და „დემოკრატიული მოძრაობისა“ და კოალიციის პოლიტიკურ დაახლოებას არ მოასწავებს.

მისი განცხადებით, „ქართულმა ოცნებამ“ მაჟორიტარი დეპუტატობის კანდიდატები, თითქმის, ყველა რაიონში წარადგინა, ასევე, დაკომპლექტებულია კოალიციის საარჩევნო სიის პირველი ასეული, თუმცა, მათ შორის „დემოკრატიული მოძრაობის“ არც ერთი წევრი არ არის.

„დემოკრატიული მოძრაობა - ერთიანი საქართველოს“ ლიდერის განცხადებით, პარტია საპარლამენტო არჩევნებში მონაწილეობას არ მიიღებს. ბურჯანაძის განმარტებით, არჩევნებში მონაწილეობაზე უარის თქმის მიზეზი ის არის, რომ 1 ოქტომბერს არცერთი ოპოზიციური ხმა არ დაიკარგოს.

ბურჯანაძის აღნიშნულ გადაწყვეტილებას პოლიტიკური კოალიცია „ქართული ოცნების“ მხრიდან დადებითი შეფასება მოჰყვა. ბიძინა ივანიშვილის თქმით, ბურჯანაძის გადაწყვეტილება ადასტურებს, რომ ის სახელმწიფოებრივად აზროვნებს. მისივე განმარტებით, ნინო ბურჯანაძის აღნიშნული პოზიციით ბევრ შეკითხვას გაეცა პასუხი.