კოალიცია „ქართული ოცნება“ დიდგორობის დღესასწაულზე გუშინ ხელისუფლების მხრიდან განხორციელებული დარღვევების შესახებ ინფორმაციას დიპლომატიურ კორპუსს და საერთაშორისო ორგანიზაციებს მიაწვდის.

ამის შესახებ დღეს კოალიციის პრესსპიკერმა მაია ფანჯიკიძემ განაცხდა.

მისი თქმით, ხელისუფლება, დიდგორობის დღესასწაულში კოალიციის ახალგაზრდული მოძრაობის მინაწილეობას საპატრულო პოლიციის მეშვეობით დაუპირისპირდა.

„პოლიციის თანამშრომლები აშკარად გამოხატავდნენ კონკრეტული პოლიტიკური პარტიის ინტერესებს და მაისურების მიხედვით არჩევდნენ ახალგაზრდებს“ - განაცხადა ფანჯიკიძემ და აღნიშნა, რომ ოპერაციას პოლიციის ვიცე-პოლკოვნიკი კოტე დიღმელაშვილი ხელმძღვანელობდა, რომელმაც კოალიციის წარმომადგენლებს განუცხადა, რომ ეს „ნაციონალური მოძრობის“ ღონისძიება იყო და არ შეიძლებოდა მასზე სხვა პოლიტიკური პარტიის წევრთა დასწრება.

ამასთან, პრესსპიკერმა განაცხადა, რომ საპატრულო პოლიციამ 12 მიკროავტობუსი უსაფუძვლო ბრალდებებით უკანონოდ დააჯარიმა და საჯარიმო ავტოსადგომზე გადაიყვანა.

ფანჯიკიძის თქმით, ხელისუფლება აგრძელებს მცდელობას ხელი შეუშალოს „ქართული ოცნების“ წინასაარჩევნო კამპანიას, რასაც, მისივე თქმით, არანაირი კავშირი არა აქვს იმ დეკლარაციასთან, რომელსაც „ნაციონალურმა მოძრაობამ“ მოაწერა ხელი და რომელმაც, თითქოს დაპირისპირების, შუღლის გაღვივებისა და ერთმანეთის ხელის შეშლის თავიდან აცილება უნდა უზრუნველყოს.

ამასთან, მან ხაზი გაუსვა, რომ მმართველ პარტიას ჰქონდა მცდელობა მიეთვისებინა საერთო სახახლო დღესასწაული - დიდგორობა და ამავდროულად მოქალაქეები არავის გაუფრთხილებია, რომ დიდგორობისას პარტიული ღონისძიება იგეგმებოდა.

კოალიციის წარმომადგენლები დიპლომატიური კორპუსისა და საერთაშორისო ორგანიზაციების წარმომადგენლებს ხვალ 12.00 საათზე შეხვდებიან.

თეთრიწყაროს მუნიციპალიტეტში 12 აგვისტოს გამართულ სახალხო ზეიმზე - „დიდგორობა 2012“ კოალიციის ახალგაზრდული ორგანიზაციის წარმომადგენლები დიდგორის მემორიალის ტერიტორიაზე პოლიციამ მთელი დღის განმავლობაში არ შეუშვა.