რუსთავის მერია ჟიული შარტვას სახელობის მოედანზე აქციის გამართვაზე პასუხისმგებლობას პოლიტიკურ კოალიცია „ქართულ ოცნებას“ აკისრებს.

ამის შესახებ „ნიუსპრესს“ რუსთავის მერიის პრესსამსახურში განუცხადეს.

პრესსამსახურის წარმომადგენლის განმარტებით, იმ შემთხვევაში, თუ „ქართული ოცნება“ აქციას მერიის სურვილის წინააღმდეგ, ჟიული შარტავას მოედანზე გამართავს, იქ განვითარებულ ნებისმიერ მოვლენასა და შედეგზე პასუხისმგებლობა აქციის ორგანიზატორებმა უნდა აიღონ.

„ორგანიზაციამ აღნიშნულ ტერიტორიაზე აქციის გამართვის შესახებ გაფრთხილებით მოგვმართა, ჩვენ მივეცით რეკომენდაცია და განვუმარტეთ, თუ რატომ არ შეიძლებოდა ამ ადგილზე მანიფესტაციის გამართვა. თუ გაითვალისწინებენ ძალიან კარგი“ - აღნიშნეს პრესსამსახურში.

კოალიცია „ქართული ოცნების“ მაჟორიტარი დეპუტატობის კანდიდატმა რუსთავში ზვიად ძიძიგურმა დღეს განაცხადა, რომ მიუხედავად რუსთავის მერიის პოზიციისა, კოალიციის აქცია 19 აგვისტოს, ჟიული შარტავას მოედანზე გაიმართება.

მისივე თქმით, რუსთავის მერია კოალიციას აქციის გასამართად ალტერნატიულ ფართს ქალაქგარეთ, ყოვლად შეუფერებელ ადგილზე სთავაზობს. ძიძიგური აცხადებს, რომ „შეკრებისა და მანიფესტაციის შესახებ“ საქართველოს კანონის თანახმად, კოალიციას არ აქვს ვალდებულება, აქციის გამართვაზე ნებართვა მერიისგან ითხოვოს. მან ამის შესახებ მერიას მხოლოდ უნდა აცნობოს.