კოალიცია „ქართული ოცნების“ ლიდერმა ბიძინა ივანიშვილმა და კოალიციის მაჟორიტარი დეპუტატობის კანდიდატმა სამტრედიაში კახი კალაძემ, შესაძლოა, კახეთში სტიქიით დაზარალებული მოსახლეობის საკომპენსაციოდ,  სახელმწიფო ბიუჯეტში დამატებითი თანხები გადარიცხონ.

როგორც დღეს პრესკონფერენციაზე კოალიციის პრესსპიკერმა მაია ფანჯიკიძემ განაცხადა, ივანიშვილი და კალაძე არ აპირებენ სასამართლოს მიერ გასულ კვირას უკანონოდ დაკისრებული ჯარიმების გადახდას, თუმცა, ამასთანავე, ფანჯიკიძემ აღნიშნა, რომ თუ ხელისუფლება მიიჩნევს, რომ ბიძინა ივანიშვილის მიერ გადარიცხული 80 მლნ ლარი არ არის საკმარისი მოსახლეობის ზარალის სრული კომპენსირებისთვის „ბიძინა ივანიშვილი და კახი კალაძე გადახედავენ ამ თემას და შესაძლოა, კომპენსაციას მათი მხრიდან დამატებითი თანხა შეემატოს“.

ფანჯიკიძის განცხადებით, ხელისუფლება აცხადებს, რომ სტიქიით მიყენებული ზარალი 80 მლნ ლარს აღემატება და, რომ მოძიებულია ის სახსრები, საიდანაც მოსახლეობას ზარალი აუნაზღაურდება.

„თუ ის 80 მლნ არ არის საკმარისი, ასეთ შემთხვევაში, ბიძინა ივანიშვილი და კახი კალაძე მზად არიან დაეხმარონ მოსახლეობს, რომ მათ მიიღონ სრული კომპენსაცია. თუ ამისთვის ერთადერთი ლეგალური გზა იქნება ჯარიმის გადახდა, შესაძლოა, ეს გზა გამოყენებული იქნას“- განაცხადა ფანჯიკიძემ.

ამასთნავე, მან ზახგასმით აღნიშნა, რომ ხელისუფლებას კომპენსაციის დარიგება ჯერ არ დაუწყია და „ქართული ოცნება“ კატეგორიულად მოითხოვს პასუხს, თუ რატომ ჭიანურდება თანხების გაცემა მაშინ, როცა ხელისუფლებას დაუგეგმავი 80 მლნ ლარი გააჩნია ბიუჯეტში.

სახელმწიფო აუდიტის სამსახურმა პოლიტიკური კოალიცია „ქართული ოცნების“ ლიდერს ბიძინა ივანიშვილსა და კოალიციის მაჟორიტარი დეპუტატობის კანდიდატს კახი კალაძეს ანგარიშებიდან გატანილი თანხის უკან დაბრუნების წინადადებით მიმართა. აუდიტის სამსახურის ინფორმაციით, დასახელებულ პერიოდში ივანიშვილმა 5 552 135, ხოლო კახი კალაძემ 3 388 992 ლარი გაანაღდა.

სასამართლომ დეპუტატობის კანდიდატის კახი კალაძის უძრავ-მოძრავ ქონებას ყადაღა დაადო და ჯარიმის სახით მას 16 944 960 ლარი დააკისრა, ხოლო კოალიცია „ქართული ოცნების“ ლიდერი ბიძინა ივანიშვილი 20 43 827 ლარით დააჯარიმა.