ექსპერტი სოსო ცისკარიშვილი პარლამენტის ყოფილი თავმჯდომარის ნინო ბურჯანაძის გადაწყვეტილებას იმის შესახებ, რომ მისი პარტია  საპარლამენტო აჩევნებში მონაწილეობას არ მიიღებს, - გონივრულს უწოდებს.
„ეს არის ყველაზე გონივრული გადაწყვეტილება. ამავდროულად მის ქვეტექსტში ჩანს სახელმწიფოს ინტერესების გათვალისწინება. კარგი იქნება, საარჩევნო სუბიექტებად დარეგისტრირებული ორი ათეული პარტია მაინც თუ მიბაძავს ბურჯანაძის მაგალითს“ - განაცხადა ცისკარიშვილმა „ნიუსპრესთან“ საუბარში.
მისი თქმით, ბურჯანაძის პარტიას სულ ცოტა, გამარჯვებულ პარტიებს შორის მოხვედრა მაინც შეეძლო.
როგორც ცისკარიშვილმა განაცხადა, დღეს სახეზეა ხელისუფლების მიერ ინიცირებული პარტიული გამოღვიძება. მისი თქმით, არჩევნების წინ გამოფხიზლდებიან ისეთი პარტიები, რომელთა სახელწოდებაც კი არავის ახსოვს.
ექსპერტი მიიჩნევს, რომ როდესაც ნინო ბურჯანაძე თავის განცხადებაში აღნიშნავს, რომ რეალურმა ოპოზიციამ რაც შეიძლება მეტი ხმა უნდა მიიღოს და მისი ფუქნცია ამ ეტაპზე ხელისუფლების შეცვლაა, ის კოალიცია „ქართულ ოცნებას“ გულისხმობს, რადგან მას რეალური მოწინააღმდეგე ოპოზიციურ სპექტრში დღეს არ გააჩნია.
პარტია „დემოკრატიული მოძრაობა - ერთიანი საქართველო“ს ლიდერმა ნინო ბურჯანაძემ 9 აგვისტოს განაცხადა, რომ მისი პარტია საპარლამენტო არჩევნებში მონაწილეობას არ მიიღებს. მისი განმარტებით, ამ გადაწყვეტილების მიზანია, რომ 1 ოქტომბერს არც ერთი ოპოზიციური ხმა არ დაიკარგოს და არ გაიყოს.