საქართველოში სამუშაო ვიზიტით მყოფი ამერიკელი რესპუბლიკელი სენატორი რიჩარდ ლუგარი დღეს, კოალიცია „ქართული ოცნებისა“ და „ქრისტიან-დემოკრატიული  მოძრაობის“ ლიდერებს შეხვდა.
შეხვედრას კოალიცია „ქართული ოცნებიდან“ დაესწრნენ დავით უსუფაშვილი, ირაკლი ლასანია და თედო ჯაფარიძე. „ქრისტიან-დემოკარტებიდან“ კი, პარტიის ლიდერი გიორგი თარგამაძე.
როგორც შეხვედრის შემდეგ ირაკლი ალასანიამ განაცხადა, საუბრის დროს განსაკუთრებული ყურადღება არჩევნების შემდეგ ხმების დათვლის სიზუსტის მნიშვნელობაზე გამახვილდა.
„ყველას კარგად ესმის, რომ ხმების დათვლის პროცესში დაუშვებელია დარღვევები და ქართველი ხალხის გადაწყვეტილება არჩევნების შედეგებში ზუსტად უნდა აისახოს“ - განაცხადა ალასანიამ.
მისი თქმით, აშშ განსაკუთრებულად დააკვირდება როგორც წინასაარჩევნო კამპანიას, ისე ხმის დათვლის პროცესს.
გარდა ამისა, როგორც ირაკლი ალასანიამ აღნიშნა, კოალიციის წარმომადგენლებმა შეხვედრაზე ყურადღება გაამახვილეს ბიზნეს-საქმიანობაში თანაბარი შესაძლებლობების არსებობის აუცილებლობაზეც.
„მონოპოლიები უნდა გაქრეს პოლიტიკიდანაც, მედიიდანაც და ბიზნესიდანაც. აშშ ამ მიმართებით სრულ მხარდაჭერას გვიცხადებს“ - აღნიშნა ალასანიამ.
შეხვედრაზე ასევე საუბარი შეეხო საქართველოდან რუსული ჯარის გასაყვანად აშშ-ს მხარდაჭერის მნიშვნელობას.
როგორც გიორგი თარგმაძემ განაცხადა, საქართველოს პოლიტიკურ სისტემაში „არჩევნების შედეგად უნდა დასრულდეს ერთი პარტიის დომინირება“.
თარგამაძის თქმით, აშშ საქართველოში საარჩევნო პროცესზე გრძელვადიან დაკვირვებას ახორციელებს. მან იმედი გამოთქვა, რომ მონიტორინგი საარჩევნო პროცესში პოზიტიურ როლს შეასრულებს.
სენატორი რიჩარდ ლუგარი ორდღიანი სამუშაო ვიზიტით საქართველოს დღეს ეწვია.