პარტია „დემოკრატიული მოძრაობა - ერთიანი საქართველო“ საპარლამენტო არჩევნებში მონაწილეობას არ მიიღებს, ამის შესახებ დღეს გამართულ ბრიფინგზე პარტიის ლიდერმა ნინო ბურჯანაძემ განაცხადა.
მისი თქმით, „დემოკრატიული მოძრაობა“ ცენტრალურ საარჩევნო კომისიაში საარჩევნო სუბიექტად დარეგისტრირდა, არჩევნებში მონაწილეობის მისაღებად, ასევე, მზად არიან პარტიული სტრუქტურები და აქტივისტები.
„მიუხედავად ჩვენი მზადყოფნისა, პარტიამ მიიღო მძიმე, მაგრამ ამ ვითარებაში ერთადერთი სწორი გადაწყვეტილება - 1 ოქტომბრის საპარლამენტო არჩევნებში მონაწილეობა არ მივიღოთ. თუმცა, ეს არ გულისხმობს, რომ ჩვენ არჩევნებს ბოიკოტს ვუხცხადებთ“-აღნიშნა ბურჯანაძემ.
მისი განმარტებით, არჩევნებში მონაწილეობაზე უარის თქმის მიზეზი ის არის, რომ 1 ოქტომბერს არცერთი ოპოზიციური ხმა არ დაიკარგოს.
„დღეს ოპოზიციის და მოსახლეობის დიდ ნაწილს მაინც სჯერა, რომ ერთ კონკრეტულ ოპოზიციურ ძალას ან კოალიციას შესწევს უნარი არჩევნებში დაამარცხოს არსებული რეჟიმი. „დემოკრატიული მოძრაობა“ ანგარიშს უწევს საზოგადოების დიდი ნაწილის პოზიციას და უარს ვამბობთ საკუთარ პოლიტიკურ ამბიციებზე, რათა ხელი არ შევუწყოთ ოპოზიციური ფლანგის მიერ ერთმანეთისთვის ხმების წართმევას“-განაცხადა“ დემოკრატიული მოძრაობის“ ლიდერმა.
დღესვე ბურჯანაძემ ამომრჩევლებს მოუწოდა - აუცილებლად მიიღონ მონაწილეობა საპარლამენტო არჩევნებში და მხარი დაუჭირონ არსებული რეჟიმის დამარცხებას.
„საქართველოს მოქალაქემ დღევანდელი რეჟიმის პირობებში, საკუთარი უსაფრთხოებისა და რისკის ფასად ხმა უნდა მისცეს რეალურ ოპოზიციას, ამიტომ, საზოგადოება კატეგორიულიდ მოითხოვს და ელის ამ ხმების დასაცავად ბოლომდე ბრძოლას“-განაცხადა ბურჯანაძემ.
ამასთან, „დემოკრატიული მოძრაობის“ ლიდერმა საერთაშორისო თანამეგობრობისა და უცხოელი დამკვირვებლების მისამართით განაცხადა, რომ ოქტომბრის არჩევნებში მათ განსაკუთრებული პასუხისმგებლობა აკისრიათ და მათ დროულად უნდა მისცენ შეფასება კონკრეტულ დარღვევებს და არა რამდენიმე თვის შემდეგ გამოაქვეყნონ ისინი თავის დასკვნებში.