კოალიცია „ქართული ოცნების“ კახეთის მაჟორიტარი დეპუტატობის კანდიდატებმა დღეს სტიქიური უბედურების შედეგების სალიკვიდაციო ღონისძიებების მონიტორინგის პირველადი მონაცემები წარმოადგინეს.
როგორც გურჯაანის მაჟორიტარობის კანდიდატმა მანანა ბერიკაშვილმა განაცხადა, გურჯაანის რაიონში სოფლების დაახლოებით 70% აღწერილია.
მისი თქმით, უმძიმესი სურათია, კერძოდ, ხშირ შემთხვევაში საცხოვრებელი სახლების აღდგენა შეუძლებელია, ხოლო ბაღ-ვენახი სრულად არის განადგურებული.
ამასთან, მისივე თქმით, ოჯახების ზარალი საშუალოდ 8-დან 10 ათასი ლარის ფარგლებში მერყეობს.
„სოფელი განადგურებისკენ მიდის, ამიტომ ამ ორი თვის განმავლობაში ხელისუფლება უნდა ვაიძულოთ, რომ მოსახლეობას რეალური ფინანსური დახმარება გაუწიოს“-განაცხადა ბერიკაშვილმა.
როგორც თელავის რაიონის მაჟორიტარობის კანდიდატმა გელა სამხარაულმა აღნიშნა, მონიტორინგის შედეგად,რომელმაც ამ ეტაპზე 1500-მდე ოჯახი მოიცვა, გამოავლინა, რომ თელავში თითო ოჯახის ზარალი საშუალოდ 3000 ლარს აღწევს, ხოლო სოფლებში 8-10 ათასი ლარია.
მისივე თქმით, მოსახლეობას ელემენტარული საყოფაცხოვრებო ნივთებიც კი არ აქვს.
რაც შეეხება ყვარლის რაიონს, დავით ქევხიშვილის განცხადებით, ძირითადად გავაზი და ბალღოჯიანი დაზარალდნენ, სადაც მიწის მაღალი მოსავლიანობიდან გამომდინარე, ოჯახების ზარალი 10 ათას ლარს აღემატება.
მაჟორიტარობის კანდიდატები აცხადებენ, რომ კოალიციის ლიდერის ბიძინა ივანიშვილის მიერ სახელმწიფო ბიუჯეტში გადარიცხული 80 მილიონი ლარი სრულიად საკმარისია იმისთვის, რომ მოსახლეობამ მიყენებული ზარალის ადეკვატური კომპენსაცია მიიღოს.
როგორც „ქართული ოცნების“ კახეთის კოორდინატორმა ირაკლი ქადაგიშვილმა აღნიშნა, არის შემთხვევები, როდესაც დაზარალებულ მოსახლეობას დახმარებაზე უარს პოლიტიკური ნიშნით ეუბნებიან, თუმცა, მისივე თქმით, ამ ფაქტების გასაჯაროების შემდეგ, ხელისუფლება იძულებული ხდება მას დაეხმაროს.
რაც შეეხება რთველს, ქადაგიშვილის თქმით, იმისთვის, რომ ეს პროცესი სამაგალითო იყოს, ერთი კილოგრამი ყურძნის ჩასაბარებელი ფასი 1 ლარი უნდა იყოს, ხოლო თუ ღვინის ქარხანა ამ ფასის გადახდას ვერ ახერხებს, განსხვავება სახელმწიფომ უნდა დაფაროს.
მისივე თქმით, ივანიშვილი მზად არის ამ პროცესში ფინანსური დახმარება გაწიოს.
კოალიციის მაჟორიტარობის კანდიდატები მონიტორინგს კიდევ ერთი კვირა გააგრძელებენ, რის შემდეგაც შედეგები გაანალიზდება და შეჯამდება.
კახეთში სტიქიის შედეგად დაზარალებული ოჯახების საკომპენსაციოდ ხელისუფლება ოჯახზე მაქსიმუმ 1500-მდე ლარის გამოყოფას გეგმავს.