პოლიტიკური ნიშნით მსჯავრდებულთა სიაში შესული აკადემიკოსი ვლადიმერ ვახანია 1 ოქტომბრის საპარლამენტო არჩევნებში მონაწილეობის მისაღებად მაჟორიტარობის  კანდიდატად დარეგისტრირდა.
ცესკოს ცნობით, ვახანია მაჟორიტარად საინიციატივო ჯგუფმა წარადგინა.
ვლადიმერ ვახანიას დეპუტატობის კანდიდატად კენჭისყრის სურვილის შესახებ, „ნიუსპრესს“ მსჯავრდებულის ოჯახის წევრებმაც დაუდასტურეს.
როგორც „ნიუსპრესს“ ცესკო-ში განუცხადეს, მსჯავრდებულს აქვს როგორც აქტიური ისე პასიური საარჩევნო უფლება, თუმცა, გასათვალისწინებელია თუ რა სიმძიმის დანაშაულისთვის იხდის სასჯელს.
რუსეთში მოღვაწე ქართველი აკადემიკოსი ვლადიმერ ვახანია სამეგრელო-ზემო სვანეთის სამხარეო პოლიციამ ჟურნალისტური საქმიანობის ხელისშეშლისა და იარაღის უკანონო შეძენა-შენახვის ბრალდებით 2009 წლის 15 მარტს საკუთარ სახლში დააკავა. ზუგდიდის რაიონულმა სასამართლომ მას 4 წლით თავისუფლების აღკვეთა მიუსაჯა.
საქართველოს ახალგაზრდა იურისტთა ასოციაციამ აღნიშნული საქმის შესწავლის შემდეგ, ვლადიმერ ვახანია პოლიტიკური ნიშნით მსჯავრდებულთა სიაში შეიყვანა.
ბრალდებულის ადვოკატმა სოსო ბარათაშვილმა ცოტა ხნის წინ განაცხადა, რომ ვახანიას საქმეში ადამიანის უფლებათა ევროპული კონვენციის თითქმის ყველა მოქმედი მუხლია დარღვეული.
საქმესთან დაკავშირებით, ადამიანის უფლებათა ევროპულ სასამართლოში წარმოებაშია მიღებული ორი განაცხადი - სასამართლოებში ჩადენილი დარღვევების შესახებ და ვახანიას პირობით ვადაზე ადრე გათავისუფლების თაობაზე. როგორც ბარათაშვილმა აღნიშნა, პატიმრის ჯანმრთელობის მდგომარეობა მძიმეა და მას მკურნალობა ესაჭიროება.