საერთაშორისო საპარლამენტო კავშირის (IPU) რიგით 140-ე ასამბლეის პარალელურად დოჰაში პარლამენტების გენერალური მდივნების ასოციაციის შეხვედრები იმართება, რომელშიც საქართველოს პარლამენტის აპარატის უფროსი გივი მიქანაძე მონაწილეობს.

ასოციაციის შეხვედრაზე პარლამენტების ინსტიტუციური გაძლიერების, უმაღლესი საკანონმდებლო ორგანოს მუშაობის ეფექტიანობის გაზრდისა და საპარლამენტთაშორისო თანამშრომლობის გააქტიურების საკითხებზე იმსჯელეს.

საქართველოს პარლამენტის აპარატის უფროსი კოლეგების წინაშე პრეზენტაციით წარსდგა და რეგიონული თანამშრომლობის უპირატესობების, ასევე, სამომავლო პერსპექტივების შესახებ ისაუბრა.

გივი მიქანაძემ რეგიონული თანამშრომლობის მნიშვნელობას გაუსვა ხაზი და ყურადღება აღმოსავლეთ პარტნიორობის ქვეყნების პარლამენტების კვლევით ცენტრზე გაამახვილა, რომელიც, მისი შეფასებით, თანამშრომლობის წარმატებული მაგალითია.

საქართველოს პარლამენტის აპარატის ხელმძღვანელმა ასოციაციის წევრებს ცენტრის მუშაობის სპეციფიკა და გამოცდილება გააცნო. გივი მიქანაძემ ისაუბრა მიმდინარე და დაგეგმილი პროექტების შესახებაც და კოლეგებს რეგიონული თანამშრომლობის გაღრმავებისკენ კიდევ ერთხელ მოუწოდა.

პრეზენტაციის შედეგ შეხვედრა კითხვა-პასუხის ფორმატში გაგრძელდა.

​