საქართველოს პრეზიდენტი მიხეილ სააკაშვილი კრემლს საქართველოს დამორჩილების ახალი გეგმის შემუშავებაში ადანაშაულებს.
სახელმწიფოს მეთაურმა გორის სამხედრო  აკადემიაში სიტყვით გამოსვლისას განაცხადა, რომ რუსეთის ახალი გეგმა საქართველოს შიგნიდან გატეხვას ითვალისწინებს.
მისი თქმით, რუსეთმა გადაწყვიტა, რომ უმჯობესია საქართველოს ქართველთა ხელით დამორჩილება.
„ამ ახალი პუტინური გეგმის გათვლა იმას ემყარება, რომ ქართველები წინააღმდეგობის გაწევით დაიღლებიან, რომ შემართება და საბრძოლო სულისკვეთება დაუჩლუნგდებათ. ამ ახალი გეგმის ავტორებს საქართველოს ისტორია კარგად აქვთ შესწავლილი და იციან, რომ ყოველთვის შეიძლება მოიძებნოს ისეთი ქართველი, რომელიც საკუთარი კეთილდღეობის სანაცვლოდ, დამპყრობელთან შერიგებას დათანხმდება“ - აღნიშნა პრეზიდენტმა.
მისი თქმით, ყველა შემთხვევა, როდესაც საქართველო კომპრომისზე წავიდა და გათვლა დამპყრობლის გულმოწყალებაზე გააკეთა, ჩვენი ეროვნულობის სრული გათელვით დამთავრდა.
„საქართველომ საკუთარი დამოუკიდებლობის შენარჩუნება იმიტომ შეძლო, რომ არასდროს დანებდა, არასდროს გადადგა ნაბიჯი უკან და არასდროს გაყვა იმ ქართველებს, რომლებიც დამპყრობლებთან შერიგებას გამუდმებით გვიყიჟინებდნენ“ - განაცხადა სახელმწიფოს მეთაურმა და დასძინა, რომ დღეს ქართველებს დამოუკიდებლობის ხუთჯვრიანი დროშა 2008 წლის ომში დაღუპული მებრძოლების გმირობის წყალობით უჭირავთ ხელში.
მისი თქმით, კრემლს საქართველოსთან მიმართებაში, შესაძლოა, ბევრი ოცნება აქვს, მაგრამ ქართველ ხალხს კრემლის ოცნებების გვერდის ავლით, საქართველოს მომავლის თავისი გეგმა გააჩნია და ეს გეგმა, მისივე თქმით, თავისუფლება, განვითარება და წინსვლაა.