საქართველოს პარლამენტის თავმჯდომარე, ირაკლი კობახიძე სერბეთის რესპუბლიკის პრემიერმინისტრს, ანა ბრნაბიჩს შეხვდა.

საქართველოს პარლამენტის პრესსამსახურის ცნობით, შეხვედრაზე არსებული ორმხრივი ურთიერთობები განიხილეს და თანამშრომლობის სხვადასხვა მიმართულებით გაღრმავებაზე იმსჯელეს. ყურადღება გამახვილდა ორ ქვეყანას შორის ეკონომიკური ურთიერთობების გაღრმავებაზე. ამ კონტექსტში, აღინიშნა, რომ თანამშრომლობის გააქტიურებას ხელს შეუწყობს საქართველოსა და სერბეთს შორის ჩამოყალიბებული ეკონომიკური კომისია, რომლის სხდომაც მიმდინარე წლის ზაფხულში, თბილისში გაიმართება.

როგორც შეხვედრის დასრულების შემდეგ პარლამენტის თავმჯდომარემ ჟურნალისტებს განუცხადა, საქართველოსა და სერბეთს შორის ეკონომიკური კავშირების განვითარებას ხელს შეუწყობს ორი ქვეყნის ბიზნესფორუმი, რომელიც დღეს გაიხსნება.

„სერბეთის პრემიერმინისტრთან ჩვენი თანამშრომლობის ძირითად პოლიტიკურ და ეკონომიკურ განზომილებაზე ვისაუბრეთ. აღინიშნა, რომ არის სერიოზული პერსპექტივა ეკონომიკური ურთიერთობების განვითარების თვალსაზრისით და ამაზე საჭიროა აქტიური მუშაობა. დღეს ვხსნით პირველ ბიზნესფორუმს, რომელიც ხელს შეუწყობს ეკონომიკური კავშირების განვითარებას ჩვენს ორ ქვეყანას შორის“ - განაცხადა ირაკლი კობახიძემ.

პარლამენტის თავმჯდომარე დელეგაციასთან ერთად, სერბეთის რესპუბლიკაში იმყოფება. დელეგაციის შემადგენლობაში დეპუტატები: გოგა გულორდავა, გიორგი თოთლაძე, ზაქარია ქუცნაშვილი და დავით ბაქრაძე, ასევე, პარლამენტის თავმჯდომარის კაბინეტის უფროსი, ნიკოლოზ სამხარაძე შედიან.