ფრაქცია "ქრისტიან-დემოკრატების" თავმჯდომარე გიორგი ახვლედიანი ლაზიკის შესახებ კანონპროექტს კურიოზს უწოდებს.

"ნიუსპრესთან" საუბარში გიორგი ახვლედიანმა განაცხადა, რომ ნებისმიერი ქვეყანა ახალ ქალაქს მაშინ აშენებს, როდესაც არსებულ ქალაქებში მოსახლეოების სიჭარბეა და სერიოზული განსახლების პრობლემაა.

"საქართველოს არც ერთ ქალაქში არ არის მოსახლეობის სიჭარბე, ნამდვილად არ გვაქვს მოქალაქეების დატევის პრობლემა. ეს არის ბაქი–ბუქი, რომ ჩვენ ჭაობებს ვაშრობთ, ქალაქებს ვაშენებთ და ხალხს ვასაქმებთ. ის ასობით მილიონი, რომელსაც აპირებენ ლაზიკაში, სჯობს, ჩვენი ქალაქების ინფრასტრუქტურის განვითარებისთვის დაიხარჯოს," – აღნიშნა ახვლედიანმა.

მიხეილ სააკაშვილმა გუშინ განაცხადა, რომ უახლოეს ხანში ლაზიკასთან დაკავშირებულ კანონპროექტს პარლამენტში შეიტანს.