საგარეო ურთიერთობათა კომიტეტის თავმჯდომარემ, სოფიო ქაცარავამ, შეხვედრა გამართა ინდონეზიის რესპუბლიკის სახალხო საკონსულტაციო ასამბლეის თავმჯდომარის მოადგილე ჰიდეიათ ნურ ვაჰიდსა და მის თანმხლებ დელეგაციასთან.

შეხვედრაში მონაწილეობდნენ კომიტეტის წევრებიც - გიორგი ხატიძე და რამაზ ნიკოლაიშვილი.

მხარეებმა განიხილეს ორმხრივი საპარლამენტო და პოლიტიკური თანამშრომლობის გაღრმავების საკითხები. საუბარი შეეხო ეკონომიკური კავშირების გაძლიერებასაც. ორმხრივი ურთიერთობების გაძლიერების მაღალი ინტერესის გათვალისწინებით მხარეებმა საქართველოში ინდონეზიის საელჩოს გახსნის საკითხზეც იმსჯელეს. მხარეები შეთანხმდნენ, რომ უახლოეს მომავალში ორივე ქვეყნის საკანონმდებლო ორგანოში მეგობრობის ჯგუფები ჩამოყალიბდება, რომლებიც ხელს შეუწყობენ როგორც საპარლამენტო კავშირების, ასევე სექტორული თანამშრომლობის გაღრმავებასაც.

"სამხრეთ-აღმოსავლეთ აზიისა და ოკეანეთის ქვეყნებთან თანამშრომლობა მნიშვნელოვანია. არსებობს დიდი პოტენციალი და საპარლამენტო კავშირების გაძლიერება ამ ყველაფერს ხელს შეუწყობს ურთიერთსასარგებლო შედეგების მისაღებად," - განაცხადა სოფიო ქაცარავამ.