საქართველოს საელჩომ სოფლის მეურნეობის სექტორში დასაქმებულ თხუთმეტ მეწარმეს უმასპინძლა, რომლებიც კავშირის - „აგროსერვისის“ წევრები არიან.

საგარეო უწყების ინფორმაციით, საქართველოს საელჩოში შეხვედრაზე საქართველოსა და ნიდერლანდების სამეფოს შორის ბიზნეს სექტორში თანამშრომლობის პერსპექტივები განიხილეს.

„ნიდერლანდების სამეწარმეო სააგენტოს“ (RVO) და საქართველოში ნიდერლანდების სამეფოს საელჩოს ინიციატივითა და ორგანიზაცია „The Netherlands Export Combination“-ის ორგანიზებით, 11-15 მარტს „აგროსერვისში“ გაერთიანებული მეწარმეები ნიდერლანდებში სასწავლო ბიზნეს პროგრამით იმყოფებიან. კავშირი ,,აგროსერვისი” სოფლის მეურნეობის სექტორში დასაქმებულ ფერმერებსა და იურიდიულ სუბიექტებს ემსახურება. სოფლის მეურნეობის სფეროში მოღვაწე მენეჯერებისათვის შემუშავებული პროგრამის მიზანი კომპანიების საქმიანობის გაფართოების ხელშეწყობაა.

პროექტის ფარგლებში შერჩეულ კანდიდატებს შესაძლებლობა აქვთ, პრაქტიკული ცოდნა და საერთაშორისო გამოცდილება ჰოლანდიელი ბიზნეს ექსპერტებისგან მიიღონ. მისიის ფარგლებში მონაწილეები სხვადასხვა კომპანიებს ეწვევიან, დაესწრებიან სემინარებს ევრო სტანდარტების დანერგვისა და პრაქტიკული უნარ-ჩვევების გაღრმავების მიზნით, აგრეთვე შედგება ორმხრივი „B2B“ შეხვედრები პოტენციურ პარტნიორებთან.