„ქრისტიან-დემოკრატიული მოძრაობის“ ლიდერებმა გორიში ამორმჩეველთან მასშტაბური შეხვედრა გამართეს.

როგორც „ნიუსპრესს“ „ქრისტიან-დემოკრატებიდან“ აცნობეს, შეხვედრა გორის კულტურის სახლში გაიმართა და მას შიდა ქართლიდან ჩასული მხარდამჭერები ესწრებოდნენ.

მოძრაობის ლიდერებმა გორელებს „ქრისტიან-დემოკრატების“ წინასაარჩევნო პროგრამა - „ერთიანი საქართველო ყველა თაობისთვის! ბავშვებს განათლება, მშობლებს დასაქმება, ხოლო პენსიონერებს დაფასება" გააცნეს.

ლიდერებმა გამოსვლებში ყურადღება პარტიის წინასაარჩევნო პრიორიტეტებზე გაამახვილეს და მოსახლეობას როგორც განათლებისა და სოფლის მეურნეობის განვითარების პროგრამები, ასევე, სხვადასხვა საკითხებზე „ქრისტიან-დემოკრატების" ხედვები გააცნეს.

„მიუხედვაად ბევრი სირთულისა, რომელიც გორელებსა და მთლიანად შიდ ქართლის მოსახლეობას აწუხებს, ისინი მაინც გმირულად უმკლავდებიან ყველა პრობლემას. ჩვენ ვპირდებით მათ, რომ ჩვენი ხელისუფლებაში მოსვლის შემთხვევაში მოგვარდება ყველა ის პრობლემა, რომელიც მოსახლობას აწუხებს“ - განაცხადა გიორგი თარგამაძემ.

„ქრისტიან - დემოკრატიული მოძრაობის“ ერთ-ერთმა ლიდერმა ინგა გრიგოლიამ გორის მოსახლეობასთან ყურადღება ერთჯერად 20 და 30 ლარიან დახმარებაზე გაამახვილა.

გრიგოლიას თქმით, ნაცვლად იმისა, რომ სამუშაო ადგილები შეიქმნას, მთვავრობა დახმარების სახით 20 და 30 ლარიან ვაუჩერს არიგებს, რომელიც წინასაარჩევნო მოწყალებას უფრო ჰგავს, ვიდრე რეალურ დახმარებას.

„მიშა სააკაშვილის დრო ამ ქვეყანაში საბოლოოდ ამოიწურა და სააკაშვილ - მერაბიშვილის 20 და 30 ლარიანი ვაუჩერები ხალხისთვის შეურაცმყოფელი და დამამცირებელია. საკუთარ ოჯახებში მიიტანონ 20 და 30 ლარიანი ვაუჩერები და ერთი დღე მაინც იცხოვრონ ისე, როგორც ხალხი ცხოვრობს“ - განაცხადა გრიგოლიამ.