საქართველოს პრემიერ-მინისტრი ვანო მერაბიშვილი წყალტუბოს რაიონში ჩავიდა და ადგილობრივ ფერმერებს ხილისა და ბოსტნეულის ექსპორტის  სახელმწიფო კომპანიის შექმნის ინიციატივა გააცნო.

საქართველოს მთავრობის ვებ-გვერდის ინფორმაციით, პროექტის პრეზენტაციას „შპს საქართველოს ხილისა და ბოსტნეულის ექსპორტის სახელმწიფო კომპანიის" დირექტორი გიორგი ჯახუტაშვილი ესწრებოდა.

როგორც ვანო მერაბიშვილმა აღნიშნა, ხილისა და ბოსტნეულის სახელმწიფო კომპანიის მიზანი ქართველი გლეხებისა და ფერმერების მიერ წარმოებული პროდუქციის რეალიზაციაში ხელშეწყობაა.

„იმისთვის, რომ გლეხებმა თავისი ჭარბი პროდუქცია საზღვარგარეთ გაიტანოს სახელმწიფო კომპანია შევქმენით. უცხოეთში ქართული პროდუქციის გატანა ექსპერიმენტულად უკვე დაიწყო“ - განაცხადა მერაბიშვილმა.

მისი თქმით, კომპანია მწარმოებლებს საბაჟო პროცედურების გამარტივებულად გავლის, პროდუქციის ტრანსპორტირების და მათი საზღვარგარეთის ბაზრებზე გატანის მიმართულებით დაეხმარება.

ამისთვის მთელი საქართველოს მასშტაბით, ხილისა და ბოსტნეულის შემგროვებელი პუნქტები გაიხსნება, რომლებიც მიღებული პროდუქციის დახარისხების, დაფასოების და შენახვის თანამედროვე ტექნოლოგიებით აღიჭურვება. პროდუქციის ტრანსპორტირებაში აქტიურად ჩაერთვება რკინიგზა და ავიაცია.

„თუ სახელმწიფო კომპანიას პროდუქცია გაუფუჭდა, თუ გვიან ჩაიტანა, ამ შემთხვევაში კომპენსაციას ფერმერი, გლეხი და მწარმოებელიც მიიღებს“ - აღნიშნა პრემიერმა.

მერაბიშვილის განცხადებით, შემგროვებელი პუნქტები გაიხსნება გურჯაანში, სადაც ატამს, ქლიავს და ხურმა-კარალიოკს ჩიბარებენ, ასევე გორში, ახალციხეში, ჩაქვში, ინგირში, სამტრედიაში და წყალტუბოში.

ყველაზე თანამედროვე ჩამბარებელი პუნქტი კი, მერაბიშვილის თქმით, წყალტუბოში იქნება, სადაც მწვანილს თანამედროვე მეთოდებით შეფუთავენ და უკრაინის საწყობში გადაიტანენ.

„ამჟამად, უკრაინაში შემნახველი ტერმინალის მშენებლობა მიმდინარეობს, საიდანაც ქართული ხილისა და ბოსტნეულის, როგორც უკრაინის, ისე აღმოსავლეთ ევროპის სხვა ქვეყნების ბაზრებზე გატანა მოხდება“ - განაცხადა მერაბიშვილმა.

მისივე თქმით, ქართველი ფერმერებისა და გლეხებისთვის ბაზრებზე მოთხოვნის არასტაბილურობა დღემდე მნიშვნელოვან გამოწვევად რჩებოდა, რაც ფინანსურ დანაკარგებს იწვევდა.