მიუხენში მიმდინარე უსაფრთხოების საერთაშორისო კონფერენციის ფარგლებში საქართველომ ნატო-ს გაფართოების საკითხებისადმი მიძღვნილ მრგვალ მაგიდას უმასპინძლა.

ღონისძიებას პრემიერ-მინისტრის მამუკა ბახტაძის ხელმძღვანელობით ქართული მხარე უძღვებოდა.

გამომსვლელებს შორის დამსწრე საზოგადოებას სიტყვით საქართველოს საგარეო საქმეთა მინისტრმა დავით ზალკალიანმაც მიმართა, რომელმაც დეტალურად მიმოიხილა ნატოსა და ევროკავშირში ინტეგრაციის გზაზე საქართველოს მიერ წინ გადადგმული ნაბიჯები და ქვეყანაში გატარებული რეფორმები.

დავით ზალკალიანმა ფართოდ მიმოიხილა საქართველოს ნატო-ში ინტეგრაციის პოლიტიკური და პრაქტიკული ასპექტები. მან განსაკუთრებული ყურადღება გაამახვილა ჩრდილოეთ მაკედონიის მიერ ნატოსთან გაფორმებულ შეთანხმებაზე, მიულოცა თავის კოლეგას და აღნიშნა, რომ ჩრდილოეთ მაკედონიის მაგალითი იმედის მომცემია საქართველოსთვისაც ნატოს ღია პოლიტიკის თვალსაზრისით.

მინისტრმა ხაზი გაუსვა ასევე ქვეყნის მოსახლეობის მაღალ მხარდაჭერას ევროპულ და ევროატლანტიკურ სტრუქტურებში ინტეგრაციის მიმართ და აღნიშნა რომ მოსახლეობის 78%-ზე მეტი მხარს უჭერს ნატოში ინტეგრაციას.

„განსაკუთრებით მინდა აღვნიშნო ბრიუსელში ნატოს უკანასკნელ სამიტზე საქართველოს მონაწილეობის ფაქტი, რამეთუ ეს იყო პირველი შემთხვევა, როდესაც ჩენი ქვეყანა უკრაინასთან ერთად ამ დონის სამიტზე იყო წარმოდგენილი და განიხილებოდა შავი ზღვის უსაფრთხოების ჭრილში. აშკარაა რომ შავი ზღვის რეგიონი ნატოსთვის სტრატეგიული თვალსაზრისით უფრო მნიშვნელოვანი ხდება“ - განაცხადა სიტყვით გამოსვლისას საგარეო უწყების ხელმძღვანელმა.

მინისტმა ასევე აღნიშნა, რომ ბრიუსელის სამიტზე მიღებული დეკლარაცია, რომელიც კიდევ ერთხელ ხაზს უსმევს ქვეყნის ნატოში ინტეგრაციის მზაობას, ამყარებს ბუქარესტის სამიტის გზავნილებს, რომ ნატოს კარი საქართველოსთვის ღიაა და საქართველო აუცილებლად გახდება ალიანსის წევრი.

გამოსვლისას დავით ზალკალიანმა ასევე მიმოიხილა სტრატეგიული პარტნიორობა ამერიკის შეერთებულ შტატებთან, განსაკუთრებით კი უსაფრთხოებისა და თავდაცვის სფეროებში გაძლიერებული თანამშრომლობა.

მრგვალი მაგიდის სტუმრებს შორის წარმოდგენილნი იყვნენ მიუნხენის უსაფრთხოების კონფერენციის თავმჯდომარე ვოლფგანგ იშინგერი, ნატო-ს გენერალური მდივნის მოადგილე როუზ გოტმიოლერი, ჩრდილოეთ მაკედონიის თავდაცვის მინისტრი რადმილა შეკერინსკა და საექსპერტო წრეების ცნობილი წარმომადგენლები.