საქართველოს საგარეო საქმეთა მინისტრი, დავით ზალკალიანი ლიხტენშტეინის სგარეო საქმეთა, კულტურისა და იუსტიციის მინისტრს შეხვდა.

საგარეო უწყების პრესსამსახურის ინფორმაციით, დავით ზალკალიანმა და აურელია ფრიკმა ორი ქვეყნის თანამშრომლობის დღის წესრიგში არსებული საკითხები მიმოიხილეს და მაღალი შეფასება მისცეს საქართველოსა და ლიხტენშტეინის სამთავროს შორის მჭიდრო და ურთიერთსასარგებლო თანამშრომლობას, განსაკუთრებით საერთაშორისო ორგანიზაციების ფარგლებში.

დავით ზალკალიანმა მადლობა გადაუხადა აურელია ფრიკს საქართველოს მიმართ გამოხატული მხარდაჭერისთვის, მათ შორის საქართველოს სუვერენიტეტისა და ტერიტორიული მთლიანობის საკითხზე საერთაშორისო ფორმატებში აქტიური პოზიციისთვის.

მინისტრებმა ხაზი გაუსვეს წარმატებულ თანამშრომლობას ვაჭრობის, ეკონომიკისა და ტურიზმის სფეროში.

დადებითად შეფასდა 2018 წლის პირველი მაისიდან საქართველოსა და ლიხტენშტეინის სამთავროს, როგორც EFTA-ს წევრ ქვეყანას შორის თავისუფალი ვაჭრობის შესახებ შეთანხმების ძალაში შესვლა. დავით ზალკალიანმა კოლეგა საქართველოში ვიზიტით მიიწვია.

მინისტრების შეხვედრა მიუნხენის უსაფრთხოების კონფერენციის ფარგლებში გაიმართა.