რა თქმა უნდა, უმრავლესობაში აზრთა სხვადასხვაობა შეიძლება იყოს. ეს ძალიან ნორმალურია. ამას უნდა მივეჩვიოთ, - განაცხადა პრემიერ-მინისტრმა მამუკა ბახტაძემ ეკა ბესელიას მიერ მმართველ გუნდის შესაძლო დატოვების შესახებ საუბრისას. მისი თქმით, ისეთი მნიშვნელოვანი რეფორმის განხორციელებისას, როგორიცაა სასამართლო სისტემის რეფორმა, ბუნებრივია, როცა გუნდში განსხვავებული პოზიციები იკვეთება. 

„პარლამენტში პოლიტიკური პროცესი მიმდინარეობს. სასამართლო რეფორმა გახლავთ ის რეფორმა, რომელიც ნებისმიერი მოქალაქისთვის ძალიან მნიშვნელოვანია. მე, ზოგადად, ჩართულობასა და პლურალიზმს მივესალმები, რადგან ეს რეფორმა ამას ნამდვილად მოითხოვს. ამასთან, არსებობს სხვადასხვა პოლიტიკური შეფასებები და ესეც, ვფიქრობ, ძალიან ნორმალური და ლოგიკურია.

რაც შეეხება პოლიტიკური გუნდის პოზიციას, - რომელსაც მე სრულებით ვუერთდები და ვიზიარებ: სასიცოცხლოდ მნიშვნელოვანია, ჩამოყალიბდეს ობიექტური კრიტერიუმები და პროცედურები. ჩვენს პოლიტიკურ გუნდს ძალიან ბევრი რამ აერთიანებს. მათ შორისაა ფასეულობები და განვითარების ის ვექტორი, რომელიც საქართველომ აირჩია. მე არაერთხელ განმიცხადებია, რომ ესაა ჩვენი ცივილიზებული არჩევანი“ - განაცხადა მამუკა ბახტაძემ.