მედიისთვის წინასაარჩევნო კამპანიის გაშუქების კუთხით ზოგადი რეგულაციები ცხრა დღეში ამოქმედდება.
აღნიშნულს საქართველოს საარჩევნო კოდექსი ითვალისწინებს, რომლის თანახმადაც, კენჭისყრამდე არა უგვიანეს 50-ე დღიდან კენჭისყრის დღემდე, სამაუწყებლო ლიცენზიის მფლობელები და საზოგადოებრივი მაუწყებელი ვალდებული არიან წინასაარჩევნო აგიტაციისა და პოლიტიკური რეკლამისთვის საეთერო დროის გამოყოფის შემთხვევაში, საჯაროდ გამოაცხადონ და კომუნიკაციების ეროვნულ კომისიას ყოველკვირეულად გადასცენ ინფორმაცია რომელი რიცხვიდან რომელ რიცხვამდე და რა პერიოდულობითაა გამოყოფილი საეთერო დრო, ასევე, ერთი დღის განმავლობაში გამოყოფილი დროის ხანგრძლივობის და გრაფიკის, საეთერო დროის ტარიფის და გაწეული მომსახურების შესახებ.

ამასთან, ტელე ან რადიოკომპანიის მიერ ერთი დღის განმავლობაში გამოყოფილი ფასიანი დრო არ უნდა აღემატებოდეს მისი დღიური მაუწყებლობის საერთო მოცულობის 15%-ს და არცერთ საარჩევნო სუბიექტს არ უნდა დაეთმოს ამ დროის ერთ მესამედზე მეტი.

ფასიანი დროის ტარიფი ყველა საარჩევნო სუბიექტისთვის, როგორც კვალიფიციური, ისე არაკვალიფიციურისთვის, ერთნაირი უნდა იყოს.

აკრძალულია კენჭისყრამდე 48 საათის განმავლობაში და კენჭისყრის დღის 20:00 საათამდე, არჩევნებთან დაკავშირებული საზოგადოებრივი აზრის გამოკითხვის შედეგების გამოქვეყნება.

საქართველოს საპარლამენტო არჩევნები 1-ელ ოქტომბერს გაიმართება. პარლამენტის 77 წევრი პროპორციული საარჩევნო სისტემის საფუძველზე აირჩევა, ხოლო 73 წევრი – მაჟორიტარული საარჩევნო სისტემის საფუძველზე. პარლამენტს 4 წლის ვადით ირჩევენ.