დიასპორის საკითხებში საქართველოს სახელმწიფო მინისტრმა, პაპუნა დავითაიამ სამოქალაქო რეესტრის წარმომადგენლებთან შეხვედრაზე უცხოეთში მცხოვრები თანამემამულეების შესახებ  კანონის ბოლო დეტალები განიხილა. ინფორმაცია ამის თაობაზე "ნიუსპრესს" დიასპორის საკითხებში სახელმწიფო მინისტრის აპარატმა აცნობა.
შეხვედრაზე სამოქალაქო რეესტრის წარმომადგენებთან შეთანხმების შედეგად გადაწყდა, რომ უცხოეთში მცხოვრები თანამემამულის სტატუსის მქონე სხვა სახელმწიფოს იმ მოქალაქეებს, რომელსაც სტატუსის მოწმობა ექნებათ და რომლებიც სპორტულ აქტივობებში არიან ჩართული ან განათლებას სახელმწიფოს დაფინანსებით საქართველოში იღებენ, საქართველოს ტერიტორიაზე 360 დღის ვადით ყოფნის უფლება მიენიჭებათ.
საქართველოს პარლამენტმა კანონი ,,უცხოეთში მცხოვრები თანამემამულეებისა და დიასპორული ორგანიზაციების შესახებ"" 2011 წლის ნოემბერში მიიღო. ძალაში კი - 2012 წლის 1 მარტიდან შევა.
კანონპროექტი დიასპორის საკითხებში საქართველოს სახელმწიფო მინისტრის აპარატის მიერ მომზადდა. ის უცხოეთში მცხოვრები თანამემამულის სტატუსის განსაზღვრას და შესაბამისი დასკვნების საფუძველზე თანამემამულის დამადასტურებელი მოწმობის გაცემას ითვალისწინებს.