პოლიტიკური კოალიცია „ქართული ოცნების“ ლიდერს ბიძინა ივანიშვილსა და საქართველოს მთავრობას შორის, შესაძლოა, სამართლებრივი დავა მსოფლიო ბანკთან არსებულ საინვესტიციო დავების განხილვის საერთაშორისო ცენტრში დაიწყოს.

როგორც დღეს გამართულ პრესკონფერენციაზე კოალიციის პრესსპიკერმა მაია ფანჯიკიძემ განაცხადა, 16-17 ივლისს საქართველოში საერთაშორისო იურიდიული ფირმა „სკადენის“ ვაშინგტონისა და ლონდონის ოფისის წარმომადგენლები იმყოფებოდნენ, რომლებიც ბიძინა ივანიშვილის მიმართ საქართველოს მთავრობის მიერ შელახულ საინვესტიციო უფლებებს დაიცავენ.

მისი თქმით, „სკადენმა“ ივანიშვილის სახელით იურიდიული დოკუმენტი - „უკანასკნელი შეტყობინება დავის შესახებ“ მოამზადა, რომლის შესაბამისად, საქართველოს მთავრობას 14 დღიანი ვადა მიეცა აღიაროს ჩადენილი უკანონობები და ადვოკატებთან შეთანხმებას მიაღწიოს ბიზნესმენისთვის მიყენებული ზარალის ანაზღაურებასთან დაკავშირებით.

„ვადის უშედეგოდ ამოწურვის შემდეგ, საინვესტიციო ცენტრს არბიტრაჟის დაწყების შესახებ საჩივარი წარედგინება “ - აღნიშნა ფანჯიკიძემ.

ამასთან, ივანიშვილის ადვოკატის არჩილ კბილაშვილის განცხადებით, დოკუმენტში აღნუსხულია საინვესტიციო უფლების დარღვევის ყველა ფაქტი, რომელიც გასული წლის ოქტომბრიდან დღემდე მოხდა.

მისივე თქმით, მიუხედავად იმისა, რომ მთავრობას ჩადენილი უკანონობის აღიარებისთვის ორკვირიანი ვადა მიეცა, არავის აქვს ილუზია, რომ ხელისუფლება ზარალის ანაზღაურების სურვილს გამოთქვამს, თუმცა, ეს ფორმალობაა, იმისთვის, რომ დავა შემდეგ ეტაპზე გადავიდეს.

ამასთან, კბილაშვილის თქმით, ივანიშვილისთვის მიყებენული ზარალი რამდენიმე ასეული მილიონი აშშ დოლარია, რომელსაც პროცენტებიც დაემატება.

მისივე თქმით, „უკანასკნელი შეტყობინება დავის შესახებ“ საქართველოს პრეზიდენტსა და იუსტიციის სამინისტროს უკვე ჩაბარდა.