საქართველოს პარლამენტის აპარატის დელეგაცია, აპარატის უფროსის, გივი მიქანაძისა და აპარატის უფროსის მოადგილის, დავით გელაშვილის ხელმძღვანელობით, ვიზიტით ბერლინს ეწვია, სადაც გერმანიის ბუნდესტაგის აპარატის თანამშრომელთა მომზადება-გადამზადებასა და კვალიფიკაციის ამაღლებაზე მოღვაწე ბუნდესტაგის სტრუქტურული ერთეულებისა და კერძო და საჯარო საგანმანათლებლო დაწესებულებების ხელმძღვანელობასთან შეხვედრები გამართა.

პარლამენტის პრესსამსახურის ცნობით, ვიზიტის მიზანი გერმანიის პარლამენტის თანამშრომელთა სწავლებისთვის შემუშავებული სასწავლო პროგრამების, მეთოდოლოგიისა და სასწავლო პროცესის ხარისხის მართვის თანამედროვე სტანდარტების გაცნობა, აგრეთვე, საქართველოს პარლამენტის სასწავლო ცენტრსა და გერმანიის საგანმანათლებლო დაწესებულებებს შორის თანამშრომლობის დაწყების ხელშეწყობა წარმოადგენდა.

ვიზიტის ფარგლებში, საქართველოს პარლამენტის დელეგაციამ შეხვედრები საჯარო მოსამსახურეთა გადამზადების სფეროში ბერლინსა და ბრანდერბურგის მიწაზე მოღვაწე საგანმანათლებლო დაწესებულებების ხელმძღვანელებთან გამართა.

მნიშვნელოვანი შეხვედრა ბუნდესტაგის იმ სტრუქტურული ერთეულების ხელმძღვანელებთან გაიმართა, რომლებიც აპარატის თანამშრომელთა კვალიფიკაციის ამაღლებასა და რეგულარულ სწავლებაზე არიან პასუხისმგებელი.

გერმანელ პარტნიორებთან ერთად, მომავალ წელს, საქართველოს პარლამენტის სასწავლო ცენტრისგაძლიერებაზე გამიზნული ერთობლივი გეგმები დაისახა, რაც 2019-2020 წლების პარლამენტის სასწავლო ცენტრის სტრატეგიისა და სამოქმედო გეგმის კონკრეტული მიმართულების განხორციელება იქნება.

ვიზიტი გერმანიის საერთაშორისო თანამშრომლობის საზოგადოების (GIZ) დაფინანსებითა და ორგანიზებით განხორციელდა.

აღსანიშნავია, რომ 2018 წლის განმავლობაში პარლამენტის სასწავლო ცენტრში ძირეული რეფორმები განხორციელდა. პარლამენტის აპარატის ხელმძღვანელობის მხრიდან განსაკუთრებული პრიორიტეტი მიენიჭა სასწავლო ცენტრის გაძლიერებას, მისი ფუნქციიდან და დანიშნულებიდან გამომდინარე; გაფართოვდა თანამშრომლობა დონორ და პარტნიორ ორგანიზაციებთან და საქართველოში მოქმედ უმაღლეს და პროფესიულ სასწავლებლებთან.