მოძრაობა „სამართლიანი საქართველოსთვის“ ლიდერმა სერგო ჯავახიძემ ოქტომბრის საპარლამენტო არჩევნებში მონაწილეობის მისაღებად ცენტრალურ საარჩევნო კომისიაში განცხადება შეიტანა.
როგორც „ნიუსპრესს“ ჯავახიძემ განუცხადა, „სამართლიანი საქართველოსთვის“ მაჟორიტარი დეპუტატობის კანდიდატები მომდევნო კვირიდან დასახელდებიან.
მისივე თქმით, პირველ ეტაპზე მოძრაობა აჭარის თვითმმართველობისა და საპარლამენტო არჩევნების მაჟორიტარებს დაასახელებს, შემდეგ კი - სამეგრელოს, იმერეთისა და გურიის კანდიდატებს.
„შიდა ქართლში ორი კანდიდატი წარდგენილი გვყავს და ორსაც წარვადგენთ. დაახლოებით 10 დღეში, კახეთის მაჟორიტარობის კანდიდატებს დავასახელებთ, ბოლო კი, თბილისი იქნება. პრინციპში, ჩვენ ყველა მაჟორიტარობის კანდიდატი მზად გვყავს იმისთვის, რომ მონაწილეობა მივიღოთ არჩევნებში“- განუცხადა „ნიუსპრესს“ ჯავახიძემ და იმედი გამოთქვა, რომ „სამართლიანი საქართველოსთვის“ მომავალ საპარლამენტო არჩევნებში იმაზე მეტ ხმას მიიღებს, ვიდრე ეს 2010 წლის ადგილობრივი თვითმმართველობის არჩევნებზე მოახერხა.
ჯავახიძის თქმით, „სამართლიანი საქართველოსთვის“ არჩევნებში მონაწილეობას დამოუკიდებლად მიიღებს და მალე საარჩევნო პროგრამის პრეზენტაციასაც გამართავს.
„თანამშრომლობაზე კონსულტაციები არ შედგა. რაც შეეხება პროგრამას, იგი უკვე მზადაა და მალე გავმართავთ მის პრეზენტაციას, პროგრამას ნაწილ-ნაწილ წარვადგენთ“- აღნიშნა ჯავახიძემ და დასძინა, რომ პროგრამაში „სამართლიანი საქართველოსთვის“ პრიორიტეტებია გამოკვეთილი.
მისივე თქმით, სექტემბრის შუა რიცხვებში ყრილობა გაიმართება, რომელსაც უცხოელი სტუმრებიც დაესწრებიან.