„ლეიბორისტული პარტიის“ ლიდერი შალვა ნათელაშვილი ამერიკის შეერთებული შტატების პოლიტიკურ წრეებს პარტიის დევნაში ადანაშაულებს.

როგორც ნათელაშვილმა დღევანდელ ბრიფინგზე აღნიშნა, ოთხი წელი შესრულდა, მას შემდეგ, რაც ევროპის ადამიანის უფლებათა დაცვის სასამართლომ საქართველოს „ლეიბორისტული პარტიის“ საარჩევნო გაყალბების მსხვერპლად აღიარების შესახებ უპრეცედენტო გადაწყვეტილება გამოიტანა.

„ქვეყნისა და მსოფლიოს გასაგონად მთელი პასუხისმგებლობით ვაცხადებთ, რომ ჩვენს წინააღმდეგ დევნა ხორციელდებოდა ამერიკის დირიჟორობით, შევარდნაძე-სააკაშვილის შესრულებით და კრიმინალ ივანიშვილის ფინანსებით“- განაცხადა ნათელაშვილმა.

მისივე თქმით, მოწინააღმდეგე დღესაც იგივეა, რადგან ამერიკას არაკოლონიური თავისუფალი საქართველოსთვის „ლეიბორისტების“ ბრძოლა აღიზიანებს.

„ლეიბორისტები“ ევროსასამართლოს გადაწყვეტილების საფუძველზე, გაერთიანებული ერების ორგანიზაციაში ბრძოლის ახალ ეტაპს იწყებენ, რათა მათი თქმით, აღნიშნულმა ორგანიზაციამ ვაშინგტონის პოლიტიკური წრეების მხრიდან „ლეიბორისტული პარტიის“ ოცწლიანი დევნა აღკვეთოს.