ადამიანის უფლებათა დაცვის საერთაშორისო დღესთან დაკავშირებით, დღეს  საქართველოს პარლამენტის თბილისის სასახლეში, პლენარულ სხდომათა დარბაზში, გაიმართება კონფერენცია თემაზე: „პარლამენტის საზედამხედველო როლი ადამიანის უფლებების მდგომარეობაზე: ახალი მარეგულირებელი ჩარჩო და საუკეთესო პრაქტიკა“.



კონფერენციას გახსნის და მონაწილეებს მისასალმებელი სიტყვით მიმართავს საქართველოს პარლამენტის თავმჯდომარე. ირაკლი კობახიძე საქართველოს კონსტიტუციის ახალ რედაქციაში ადამიანის უფლებების მარეგულირებელ ნორმებსა და მათში ასახულ კონსტიტუციურ გარანტიებზე ისაუბრებს.



კონფერენციის მონაწილეებს მისასალმებელი სიტყვით მიმართავენ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე სოფიო კილაძე, საქართველოს სახალხო დამცველი ნინო ლომჯარია, ევროკავშირის ელჩი საქართველოში კარლ ჰარცელი, საქართველოში გაეროს განვითარების პროგრამის მოქმედი ხელმძღვანელი მუნხტუია ალთანგერელი და სამხრეთ კავკასიაში გაეროს ადამიანის უფლებათა უმაღლესი კომისრის ოფისის უფროსი მრჩეველი ვლადიმირ შკოლნიკოვი.


თამარ ჩუგოშვილი - პარლამენტის თავმჯდომარის პირველი მოადგილე, კონფერენციაზე საქართველოს პარლამენტის რეგლამენტის ახალი წესის მიხედვით საპარლამენტო ზედამხედველობის მექანიზმების შესახებ ისაუბრებს.



ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, სოფო კილაძე საპარლამენტო ზედამხედველობის ფარგლებში კომიტეტის როლსა და სახალხო დამცველის ყოველწლიურ ანგარიშში ასახული რეკომენდაციების იმპლემენტაციის მექანიზმებზე გაამახვილებს ყურადღებას.

კონფერენციაზე იურიდიულ საკითხთა კომიტეტის თავმჯდომარე ეკა ბესელია ადამიანის უფლებების მიმართულებით პარლამენტის საზედამხედველო როლსა და იურიდიული კომიტეტის კაზუსზე გააკეთებს მოხსენებას.



კონფერენციის ორგანიზატორია საქართველოს პარლამენტი ევროკავშირისა (EU) და გაეროს განვითარების პროგრამის (UNDP) ხელშეწყობით.


ადამიანის უფლებათა დაცვის საერთაშორისო დღე მსოფლიოში 1948 წლის 10 დეკემბერს, გაეროს გენერალურ ასამბლეაზე ადამიანის უფლებათა დაცვის საერთაშორისო დეკლარაციის მიღების შემდეგ დაწესდა.



საქართველოს პარლამენტი ადამიანის უფლებათა დაცვის საერთაშორისო დღეს ტრადიციულად ყოველ წელს აღნიშნავს.