საქართველოს საგარეო საქმეთა მინისტრმა, დავით ზალკალიანმა ბრიუსელში ნატო-ს საგარეო საქმეთა მინისტერიალის ფარგლებში უკრაინის საგარეო საქმეთა მინისტრთან, პავლო კლიმკინთან შეხვედრა გამართა.

შეხვედრაზე მინისტრებმა საქართველო-უკრაინის პარტნიორულ ურთიერთობებს ხაზი გაუსვეს და გამოთქვეს მზადყოფნა ხელი შეუწყონ სტრატეგიული თანამშრომლობის კიდევ უფრო გაღრმავებას.

საგარეო საქმეთა სამინისტროს პრესსამსახურის ცნობით, საუბარი რეგიონში არსებულ უსაფრთხოების გარემოს შეეხო. კიდევ ერთხელ იქნა დაგმობილი აზოვის ზღვაში განვითარებული მოვლენები, რაც მხარეების შეფასებით, რუსეთის ფედერაციის აგრესიის მორიგი გამოხატულება და საერთაშორისო სამართლისა და პრინციპების, მათ შორის საზღვაო სამართლის უხეში დარღვევა გახლავთ. მინისტრებმა საქართველოსა და უკრინის სუვერენიტეტისა და ტერიტორიული მთლიანობის მიმართ ორივე მხარის მტკიცე მხარდაჭერა კიდევ ერთხელ გამოხატეს.

საუბარი, ასევე, შეეხო შავი ზღვის უსაფრთხოების საკითხზე ნატოსთან თანამშრომლობას. აღინიშნა ამ მიმართულებით ალიანსისა და საქართველოს შორის უკვე არსებული პრაქტიკული თანამშრომლობის მიმართულებები, რაც ნატოს ბრიუსელის სამიტის დეკლარაციაშიც აისახა.

“ვისაუბრეთ იმ მძიმე სიტუაციაზე, რომელიც აზოვის ზღვის პრობლემასთან დაკავშირებითაა შექმნილი. უკრაინის პოზიცია მოვისმინე, ასევე ის დამოკიდებულება და ინიციატივები, რომელსაც ისინი მინისტერიალზე გააჟღერებენ. მოგეხსენებათ, რომ ჩვენი პოზიცია უკრაინასთან დაკავშირებით თანმიმდევრულია, ჩვენ მაშინვე გავაკეთეთ განცხადება, რომ ის რაც ხდება აზოვის ზღვაში საერთაშორისო სამართლის ნორმების დარღვევას წარმოადგენს და რომ საერთაშორისო თანამეგობრობის მხრიდან ამ საკითხზე მყისიერი რეაგირება აუცილებელია,” - განაცხადა დავით ზალკალიანმა უკრაინელ კოლეგასთან შეხვედრის კომენტირებისას.

საუბარი ორმხრივი თანამშრომლობის მიმდინარე საკითხებს შეეხო. მინისტრები მიესალმნენ და გამოთქვეს მზადყოფნა მაღალი დონის ვიზიტების გააქტიურებაზე აქტიურად ითანამშრომლონ. ყურადღება ქვეყნებს შორის არსებულ ეკონომიკურ თანამშრომლობაზე და მისი შემდგომი გაღრმავების მნიშვნელობაზე გამახვილდა.

უკრაინის საგრეო უწყების ხელმძღვანელმა ქართველ კოლეგას ქვეყანაში ჩატარებული საპრეზიდენტო არჩევნები მიულოცა.

აღსანიშნავია, რომ საქართველოს საგარეო საქმეთა მინისტრი, დავით ზალკალიანი ბრიუსელში იმყოფება, სადაც 4-5 დეკემბერს ნატოს საგარეო საქმეთა მინისტერიალი მიმდინარეობს. აღსანიშნავია, რომ მინისტერიალის ფარგლებში საქართველოსა და უკრაინასთან ჩრდილოატლანტიკური საბჭოს შეხვედრა გაიმართება.