ადამიანის უფლებების საყოველთაო დეკლარაციის ხელმოწერის 70 წლისთავთან დაკავშირებით, უზბეკეთის მთავრობის ინიციატივით და საერთაშორისო პარტნიორების მხარდაჭერით, სამარყანდში, ადამიანის უფლებათა აზიის ფორუმი გაიმართა, რომელსაც 400-მდე დელეგატი დაესწრო.

პარლამენტის პრესსამსახურის ცნობით, ღონისძიების მონაწილეებს ეუთოს საპარლამენტო ასამბლეის პრეზიდენტი, საქართველოს პარლამენტის წევრი, გიგი წერეთელი მიესალმა, რომელმაც ქვეყნის შიგნით და საერთაშორისო დონეებზე ადამიანის უფლებების დაცვის ვალდებულებების შესრულების პროცესში, პარლამენტის როლსა და მის ჩართულობაზე ისაუბრა.

„ძირითადი პოზიცია, რომელიც ჩვენ, პარლამენტარებს გვიკავია საზოგადოებასა და მთავრობებს შორის, ადამიანის უფლებათა დაცვის უზრუნველსაყოფად საჭირო პარტნიორებად წარმოგვაჩენს. გასაკვირი არ უნდა იყოს, რომ გაეროს მდგრადი განვითარების „2030“ დღის წესრიგი ადამიანის უფლებებზე დაფუძნებული მიდგომაა. ჩვენ არამხოლოდ ვიზიარებთ, რომ გლობალურ დონეზე ადამიანის უფლებების მდგომარეობა უნდა გაუმჯობესდეს, არამედ ვამტკიცებთ, რომ სწორედ ადამიანის უფლებების სტანდარტების დაცვამ უნდა განაპირობოს განვითარების მიზნების შესრულება“- განაცხადა გიგი წერეთელმა.

მან განსაკუთრებული ხაზი გაუსვა ადამიანის უფლებების მძიმე დარღვევებს სამხედრო კონფლიქტების რეგიონებში და იძულებით გადაადგილებულ პირთა, ასევე მიგრანტთა მიმართ.

შუა აზიის ტურნეს ფარგლებში ეუთოს საპარლამენტო ასამბლეის პრეზიდენტმა ყაზახეთის და უზბეკეთის ხელისუფლების ლიდერებთან ორმხრივი შეხვედრები გამართა