ფრაქცია "ქრისტიან-დემოკრატების" წარმომადგენელმა, ნიკა ლალიაშვილმა ხელისუფლება ეროვნული ავიაკომპანიის წინააღმდეგ ქმედებაში დაადანაშაულა.
მისი განცხადებით, ავიაკომპანია "აირზენა" დღევანდელი ეკონომიკური პოლიტიკის პირობებში ნელ-ნელა იხურება. ლალიაშვილმა ის მიზეზებიც ჩამოთვალა, თუ რას დაკარგავს საქართველო ავიაკომპანიის დახურვის შემთხვევაში.
"საქართველო კარგავს ათასამდე სამუშაო ადგილს, მილიონობით ლარის გადამხდელს, მაშინ როცა ბიუჯეტში არცერთი კაპიკი არ შეაქვთ უცხოურ ავიაკომპანიებს, საქართველო კარგავს საფრენოსნო სასწავლებელს და ბოლოს საქართველო კარგავს ყველაზე საიმედო გადამზიდავს, რომელიც კრიზისულ სიტუაციაში ყველაზე მეტად საჭიროა", - განაცხადა ლალიაშვილმა.
მისი განმარტებით, აღნიშნული თვალსაჩინო მაგალითია იმისა, როგორი არ შეიძლება იყოს სახელმწიფოს ეროვნული ეკონომიკა .
ლალიაშვილმა პოლიციის რეფორმაზეც გაამახვილა ყურადღება.
"პოლიციის რეფორმა წარმატებულად დაიწყო, თუმცა, შემდეგ არა დემოკრატიული, არამედ მოდერნიზებული ფორმით გაგრძელდა", - განაცხადა ლალიაშვილმა.
მისივე შეფასებით, პოლიცია დანაშაულის გახსნის კუთხით კარგად მუშაობს, თუმცა, იგი პოლიტიზირებულია და მოსახლეობის ნდობა არ გააჩნია.