„ეროვნულ-დემოკრატიული პარტია“ პარტიის ვებ-გვერდზე კიბერშეტევის შესახებ იუწყება. ამის შესახებ ედპ-ს ლიდერმა ბაჩუკი ქარდავამ განაცხადა.

მისი თქმით, ედპ-ს ვებ-გვერდზე კიბერშეტევა 26 ივლისს დაფიქსირდა.
„26 ივლისს საღამოს ედპ-მ მიიღო ოფიციალური წერილი იუსტიციის სამინისტროს მონაცემთა გაცვლის სააგენტოსგან, რომლის ანალიტიკური ჯგუფის მოკვლევის შემდეგ დადასტურდა, რომ აღნიშნული შეტევა განხორციელდა რუსეთის ფედერაციაში დარეგისტრირებული IP მისამართებიდან, კიბერშეტევის შედეგად დაზომბირებულ იქნა ედპ-ს ცენტრალური ოფისის ყველა კომპიუტერი და 29 ივნისიდან მოყოლებული ერთი თვის მანძლზე კონტროლდებოდა, რითაც შესაძლებელი იყო თვალთვალი პარტიის ცენტრალურ ოფისზე“ - განაცხადა პარტიის ლიდერმა.
ბაჩუკი ქარდავას თქმით, წაშლილია პარტიის საპრეზენტაციო პროგრამები და ედპ-ს მიერ ერთი თვის განმავლობაში გაკეთებული განცხადებები. პარტია ოფიციალურ ვებ-გვერდს ამ დროისთვისაც ვერ იყენებს.
კიბერშეტევასთან დაკავშირებით, პარტიამ ოფიციალურად მიმართა უწყებათაშორის კომისიას და ყველა შესაბამის სტრუქტურას.