პარლამენტის იურიდიულ საკითხთა კომიტეტმა „საქართველოს ტყის კოდექსში“ ცვლილების შეტანის შესახებ“ საქართველოს კანონის პროექტი თანმდევ კანონპროექტებთან ერთად განიხილა. საკანონმდებლო პაკეტის მიზანია ტყის მართვის ეფექტიანი მოდელის ჩამოყალიბება.

„მიზეზი რამაც ეს ცვლილებები განაპირობა მდგომარეობს იმაში, რომ მოხდეს უფრო ეფექტური ზედამხედველობა ტყის დაცვაზე და იმ დარღვევებზე, რომელიც ტყეში ხდება. დღესდღეობით ამას ახორციელებს რამდენიმე უწყება. უფრო ეფექტურად რომ მოხდეს ამ ფუნქციის განხორციელება, სატყეო სააგენტოდან ტყის მცველების შტატები გადადის ზედამხედველობის დეპარტამენტში და შესაბამისად, ერთი უწყების ქვეშ იქნება მოქცეული მთლიანად ტყეზე კონტროლისა და ზედამხედველობის ფუნქცია. ეს იწვევს ბიუჯეტში ცვლილებებს, რადგან 459 შტატი გადადის ახალ უწყებაში - ზედამხედველობის დეპარტამენტში. უნდა აღინიშნოს, რომ დაცული ტერიტორიები, რა თქმა უნდა, ცალკე დარჩება“,-განაცხადა მომხსენებელმა, გარემოს დაცვისა და ბუნებრივი რესურსების კომიტეტის თავმჯდომარემ, კახაბერ კუჭავამ.

პარლამენტის პრესსამსახურის ცნობით, კანონპროექტის თანახმად, სსიპ ეროვნული სატყეო სააგენტოს საშტატო რიცხოვნობა შემცირდება 459 ერთეულით, რომელთა სახელფასო ფონდი შეადგენდა 3 882 600 ლარს. ცვლილებების მიხედვით, იგივე ოდენობითაც გაიზრდება ზედამხედველობის დეპარტამენტის საშტატო რიცხოვნობა, მაგრამ სახელფასო ფონდი ზედამხედველობის დეპარტამენტში განისაზღვრება 6 024 000 ლარით, შესაბამისად, სხვაობა შრომის ანაზღაურების ნაწილში შეადგენს 2 141 400 ლარს. ამდენად, საშემოსავლო გადასახადის გათვალისწინებით, კანონპროექტის მიღება გავლენას მოახდენს ბიუჯეტის საშემოსავლო ნაწილზე. კომიტეტმა მხარი დაუჭირა საკანონმდებლო პაკეტის პლენარულ სხდომაზე განხილვას.

დღევანდელ სხდომაზე კომიტეტმა, ასევე, ათზე მეტი საკანონმდებლო წინადადება განიხილა.