საქართველოს პრემიერ-მინისტრის მამუკა ბახტაძის მიმდინარე წლის 31 ოქტომბრის #408 ბრძანებით საქართველოს საგარეო საქმეთა მინისტრის მოადგილედ ალექსანდრე ხვთისიაშვილი დაინიშნა.


ალექსანდრე ხვთისიაშვილი კარიერული დიპლომატი გახლავთ. მინისტრის მოადგილედ წარდგენამდე, 2015 წლიდან საგარეო საქმეთა სამინისტროს საერთაშორისო ეკონომიკურ ურთიერთობათა დეპარტამენტს ხელმძღვანელობდა.


მას საქართველოს დიპლომატიურ სამსახურში საქმიანობის მრავალწლიანი გამოცდილება აქვს - 2011-2014 წლებში დიდი ბრიტანეთისა და ჩრდილოეთ ირლანდიის გაერთიანებულ სამეფოში საქართველოს საელჩოს და საერთაშორისო საზღვაო ორგანიზაციაში საქართველოს მუდმივი წარმომადგენლობის უფროსი მრჩეველი იყო, ხოლო 2010-2011 წლებში – საერთაშორისო საზღვაო ორგანიზაციაში საქართველოს მუდმივი წარმომადგენლობის უფროსი მრჩეველი.


ალექსანდრე ხვთისიაშვილი საგარეო საქმეთა სამინისტროში სხვადასხვა დროს ევროინტეგრაციის დეპარტამენტის ევროკავშირის პოლიტიკის ანალიზისა და პროგრამების კოორდინაციის სამმართველოს უფროსი და მსოფლიო სავაჭრო ორგანიზაციების სამმართველოს მრჩეველი იყო.


ალექსანდრე ხვთისიაშვილს გასულ წელს საგანგებო და სრულუფლებიანი დესპანის დიპლომატიური რანგი მიენიჭა. მინისტრის მოადგილის რანგში ის მოვალეობის შესრულებას დღეიდან შეუდგება.