„თქვენ მოგწონთ ჩვენს მიერ შექმნილი დემოკრატია, მაგრამ ამის აღიარება არ შეგიძლიათ. ჩვენ ვხედავთ საკითხებს, რომელზეც ხალხმა თავისი პოზიცია გვითხრა. ამაზე ადეკვატური პოლიტიკური რეაქციები იქნება, როგორც მეორე ტურამდე ისე მის შემდეგ. მადლობა საზოგადოებას და განსაკუთრებული მადლობა ჩვენს მხარდამჭერებს. ჩვენ ვიბრძოლებთ და მეორე ტურში გავიმარჯვებთ. „ქართულ ოცნებას“ აქვს შესაძლებლობა და ჰყავს გუნდი, რომელიც ამ გამოწვევას უპასუხებს, გუნდი, რომელიც ხვალინდელ დღეზე იქნება პასუხსმგებელი“-ამის შესახებ საპარლამენტო უმრავლესობის წევრმა, არჩილ თალაკვაძემ პარლამენტის დღევანდელ სხდომაზე განაცხადა.

მანვე, პარლამენტის პლენარულ სხდომაზე ახალქალაქში მომხდარი ფაქტი შეაფასა. მისი თქმით, ძალადობის ესკალაცია ვაშაძის მხარდამჭერებმა დაიწყეს.

„ახალქალაქში მომხდარ ფაქტს რაც შეეხება, ვემიჯნებით ძალადობას და ეს ის მეთოდი არაა, რომლითაც ჩვენ არჩევნებში რაიმე შედეგს ვიღებთ. გამოძიება ამ ფაქტზე დაწყებულია. ძალადობის ესკალაცია სწორედ ვაშაძის მხარდამჭერებმა დაიწყეს, როცა დემონსტრაციულად პლაკატები ჩამოხიეს და სავარაუდოდ, ზურაბიშვილის მხარდამჭერებს მძიმე შეურაცხყოფა მიაყენეს.

რაც შეეხება სამოქალაქო ომს, „ქართული ოცნება“ ამ ქვეყანაში ადამიანის უფლებების დაცვის და მშვიდობის გარანტია. ეს პასუხი არის ერთმნიშვნელოვანი“-განაცხადა თალაკვაძემ.