„ჩვენ არ უნდა დავკმაყოფილდეთ იმით, რომ გზა მხოლოდ მოიფრეზოს და ახალი საფარი გადაეგოს. ეს გაკეთებული საქმე არ არის“ - აღნიშნული განცხადება დედაქალაქის მერმა კახა კალაძემ მთავრობის სხდომაზე გააკეთა.

მისი თქმით, ინფრასტრუქტურული სამუშაოები ფუნდამენტურად უნდა განხორციელდეს.

„ჩვენ თუ გვინდა, რომ წლების განმავლობაში ამ კონკრეტულ ადგილებს არ შევეხოთ, რა თქმა უნდა, ფუნდამენტურად უნდა მოხდეს სამუშაოების შესრულება. მე მხედველობაში მაქვს მიწის ქვემოთ ჩასვლა და იმის გაკეთება, რაც იქნება გასაკეთებელი, წყალი იქნება თუ სადენები, რომელიც ჰაერში გადადის.

ყველაფერი მიწის ქვემოთ ჩავა. ყველა პროექტზე ერთნაირი მიდგომა გვაქვს და ანალოგიური დამოკიდებულება, რომ სანიაღვრეები, წყალარინების სისტემა, ყველაფერი, რაც გასაკეთებელია უნდა მოვაწესრიგოთ, რომ ისე არ დაგვემართოს, ახალი გზა გადავაგოთ და შემდეგ, რამდენიმე კვირაში გადათხრა დაზიანებების გამო მოგვიწიოს. ამას დრო სჭირდება და ამის გამო იყო ქალაქში გარკვეული შეფერხებები, მაგრამ ყველამ გავითავისოთ, რომ ეს ყველაფერი თბილისისთვის და მისი მოსახლეობისთვის კეთდება“, - აღნიშნა კახა კალაძემ.

მისივე თქმით, 20 დღის ვადაში დასრულდება ჩიქოვანის ქუჩის რეაბილიტაცია. ამ მიზნით, სამუშაოების პირველ ეტაპზე, 10 დღის განმავლობაში მოძრაობა გადაიკეტება ამირეჯიბის გზატკეცილიდან ტეხურას ქუჩის კვეთამდე.

„საკმაოდ მასშტაბური სამუშაოები ჩატარდა. მხედველობაში მაქვს სანიაღვრე სისტემის მოწყობა, წყალარინების სისტემის მოწესრიგება, რომელიც ძალიან მძიმე მდგომარეობაში იყო და იქ მცხოვრები მოსახლეობისთვის სერიოზულ პრობლემას ქმნიდა. რა თქმა უნდა, გზის საფარი იქნება მოწესრიგებული, ასევე, საპარკინგე ადგილებიც. შეუძლებელი იყო იქ ადამიანს მანქანა გაეჩერებინა. თვითონ ქუჩაც ვიწროა და ამის შესაძლებლობა არ იყო, თუმცა ჩვენ რა რესურსიც გამოვნახეთ, შევქმენით დამატებითი საპარკინგე ადგილები და არსებულ საპარკინგე სივრცესაც მოვაწესრიგებთ“, - განაცხადა დედაქალაქის მერმა.

თბილისის მერიის პრესსამსახურის ცნობით, კახა კალაძემ მადლობა გადაუხადა მოსახლეობას თანადგომისა და მხარდაჭერისთვის და აღნიშნა, რომ მომდევნო წლებში დედაქალაქში კიდევ უფრო მეტი ინფრასტრუქტურული პროექტი განხორციელდება.