ნატო-ს შემფასებელი ჯგუფი საქართველოს ვიზიტით ეწვია. ვიზიტის ფარგლებში, საგარეო საქმეთა სამინისტროში, შემფასებელი ჯგუფის წევრების შეხვედრები საქართველოს 2018 წლის წლიური ეროვნული პროგრამის შემუშავებისა და განხორციელებაში ჩართული სახელმწიფო უწყებების წარმომადგენლებთან გაიმართა.


საგარეო საქმეთა სამინისტროს პრესსამსახურის ცნობით, შეხვედრის მონაწილეებს მისასალმებელი სიტყვით მიმართა საქართველოს საგარეო საქმეთა მინისტრის მოადგილემ, ვახტანგ მახარობლიშვილმა. მინისტრის მოადგილემ მიმოიხილა 2018 წლის წლიური ეროვნული პროგრამის განხორციელების პროცესი. შეხვედრის ფარგლებში, მხარეებმა იმსჯელეს, როგორც ნატო-საქართველოს პოლიტიკური დიალოგის გაღრმავების, ასევე პრაქტიკული თანამშრომლობის კუთხით მიღწეული ხელშესახები პროგრესის შესახებ.

შეხვედრაზე, ყურადღება გამახვილდა საკონსტიტუციო რეფორმაზე, 28 ოქტომბერს ჩატარებულ საპრეზიდენტო არჩევნებზე, დემოკრატიისა და ადამიანის უფლებების განმტკიცებაზე, მართლმსაჯულების განვითარებაზე, ქვეყნის უსაფრთხოებისა და ეკონომიკური განვითარების საკითხებზე და ასევე, აღნიშნული დოკუმენტით განსაზღვრულ სხვა მნიშვნელოვან მიმართულებებზე.

ნატო-ს შემფასებელი ჯგუფის ოფიციალური ვიზიტი 30 ოქტომბერს დასრულდება.