სინგაპურში გამართული სამუშაო ვიზიტის ფარგლებში, საქართველოს საგარეო საქმეთა მინისტრის მოადგილემ, გიორგი შარვაშიძემ სინგაპურის საგარეო საქმეთა სამინისტროს მდივნის მოადგილესთან, პიტერ ტან ჰაი ჩუანთან შეხვედრა გამართა.

როგორც საგარეო საქამეთა სამინისტორში აცხადებენ, შეხვედრისას მათ სინგაპურსა და საქართველოს შორის თანამშრომლობის დღის წესრიგში არსებულ საკითხებზე ისაუბრეს. ორივე მხრიდან ბოლო პერიოდში ორ ქვეყანას შორის ურთიერთობების ინტენსიფიკაცია აღინიშნა, მათ შორის სავაჭრო–ეკონომიკურ და ტურიზმის სფეროებში ასევე, მაღალი დონის ვიზიტების გაცვლის მნიშვნელობა. გიორგი შარვაშიძემ სინგაპურის მხარეს საქართველოს საგარეო საქმეთა მინისტრის მზადყოფნის შესახებ აცნობა, რომ სინგაპურის საგარეო საქმეთა მინისტრის ოფიციალურ ვიზიტს უმასპინძლოს.

გიორგი შარვაშიძემ შეხვედრისას პიტერ ტან ჰაი ჩუანს აცნობა, რომ სამხრეთ აღმოსავლეთ აზიის რეგიონის ქვეყნებთან და ორგანიზაცია ASEAN-თან ურთიერთობების გაღრმავება საქართველოს საგარეო პოლიტიკის ერთ–ერთ მთავარ პრიორიტეტს წარმოადგენს და სთხოვა სინგაპურის მხარდაჭერა, რომ საქართველომ ფორმალური თანამშრომლობა ASEAN-თან განავითაროს. ასევე გიორგი შარვაშიძემ სინგაპურის მხარეს ინფორმაცია საქართველოში განვითარებული მოვლენების, მიღწევების, განხორციელებული რეფორმების, საინვესტიციო გარემოს და ტურისტული პოტენციალის შესახებ მიაწოდა.

თავის მხრივ, პიტერ ტან ჰაი ჩუანმა აღნიშნა, რომ სინგაპური საქართველოსთან თანამშრომლობის გაღრმავებით დაინტერესებულია და მზად არის მხარი დაუჭიროს საქართველოს მისწრაფებას, რომ ურთიერთობები სამხრეთ აღმოსავლეთ აზიის რეგიონის ქვეყნებთან განავითაროს. ასევე განაცხადა, რომ განსაკუთრებით სინგაპურის მხარეს საქართველოში მიმდინარე ლოგისტიკურ პროექტებში მონაწილეობა აინტერესებს და ამ კუთხით გეგმავს შესაძლებლობების შესწავლას.

სამინისტროს ინფორმაციითვე, ორივე მხრიდან მზადყოფნა გამოითქვა, რომ გაგრძელდება აქტიური მუშაობა სხვადასხვა მიმართულებებით, ორმხრივი ურთიერთობების თვისობრივად ახალ ფაზაში გადასაყვანად.