საქართველოს პარლამენტის გენდერული თანასწორობის საბჭოს წევრმა გუგული მაღრაძემ მინსკში გამართულ ლიდერ ქალთა საერთაშორისო ფორუმში მიიღო მონაწილეობა, რომელიც ეუთო-ს დემოკრატიული ინსტიტუტებისა და ადამიანის უფლებათა ოფისის (OSCE/ODIHR) -ის ორგანიზებით გაიმართა.



პარლამენტის პრესსამსახურის ინფორმაციით, ფორუმში მონაწილეობდნენ ლიდერი ქალები - სახვადასხვა ქვეყნის საკანონმდებლო და აღმასრულებელი ხელისუფლების ასევე, არასამთავრობო ორგანიზაციებისა და აკადემიური წრეების წარმომადგენლები.



ფორუმზე განსახილველი თემები იყო - ქალთა მონაწილეობა პოლიტიკასა და ეკონომიკურ საქმიანობაში, ქალთა მიმართა ძალადობის წინააღმდეგ ბრძოლა ასევე, ქალთა ქსელებისა და კოალიციების გაძლიერება და ქალთა და მამაკაცთა თანაბარი წვდომა აკადემიური განათლებისადმი.



გუგული მაღრაძემ, სიტყვით გამოსვლისას, გენდერული თანასწორობის მიმართულებით საქართველოში განხორციელებულ საქმიანობაზე და ამ მიმართულებით არსებულ გამოწვევებზეც ისაუბრა.



„ქვეყანაში არის კარგი საკანონმდებლო ბაზა იმისთვის, რომ გენდერული თანასწორობა ყველა სფეროში განხორციელდეს თუმცა, არსებობს ხელისშემშლელი გარემოებები - კულტურული სტერეოტიპები. პოლიტიკური კამპანიები ქალთა მიმართ არაეთიკური დამოკიდებულებებით გამოირჩევა და ამის გამო ქალთა გარკვეული რაოდენობა, რომელთაც აქვთ მაღალი ინტელექტუალური შესაძლებლობები, განათლება როგორც პოლიტიკაში ასევე ეკონომიკაში, ხშირად თავს იკავებენ პოლიტიკაში მონაწილეობისგან. კიდევ ერთი ხელშემშლელი ფაქტორი არის ის, რომ პოლიტიკური პარტიების ხელმძღვანელები ძირითადად არიან მამაკაცები და ისინი შედარებით ნაკლებად გახსნილები არიან პოლიტიკაში ქალების მოზიდვისაკენ. ამასთან, ქალებს ხშირად არ აქვთ ფინანსური რესურსები იმისთვის, რომ პოლიტიკაში სრულფასოვნად შემოვიდნენ“, - განაცხადა გუგული მაღრაძემ.



მისი თქმით, ამ გარემოებების დასაძლევად საქართველოს საზოგადოებაში დიდი ხანია მუსირებს აზრი, რომ საჭიროა კვოტირების, როგორც დროებითი წამახალისებელი ნორმის შემოღება.



„იმისთვის, რომ პირველ რიგში, საქართველოს პარლამენტში მიღწეული იქნას ქალების კიდევ უფრო მეტი ჩართულობა, გადაწყვეტილების მიღების პროცესში არანაკლებ 30% -სა უნდა იყოს ქალი. სოციალური კვლევების შედეგებით, ჯგუფში გადაწყვეტილების მიღების დროს თუკი ქალთა რაოდენობა არ აღემატება 30%-ს მას არ შეუძლია გავლენა მოახდინოს ჯგუფის საერთო გადაწყვეტილებაზე. ქალებს სჭირდებათ გარკვეულ ეტაპზე წამახალისებელი ნორმების შემოღება. იმისთვის რომ მაღალ დონეზე მიღებული პოლიტიკური გადაწყვეტილება სრულად ასახავდეს საზოგადოების ინტერესებს, აუცილებელი და საჭიროა ქალები სათანადოდ იყვნენ წარმოდგენილი პარლამენტში“, - განაცხადა გუგული მაღრაძემ. მიუხედავად იმისა, რომ დარბაზში, აღნიშნულ საკითხთან დაკავშირებით აზრთა სხვადასხვაობა გამოითქვა, საქართველოს პარლამენტის წევრის მოსაზრება დამსწრე საზოგადოების უმრავლესობამ გაიზიარა.



ფორუმის მონაწილეებმა რეკომენდაციები მიიღეს იმასთან დაკავშირებით, რომ გაძლიერდეს ქალთა კოალიციები და ქსელები.



„ქალთა მოძრაობის ერთსულოვანი დამოკიდებულება არის ძალიან მნიშვნელოვანი ფაქტორი იმისთვის, რომ მოხდეს ქალთა უფრო მეტი ჩართულობა და თანაბარი მონაწილეობა პოლიტიკაში, ეკონომიკურ სფეროში და რაც შეიძლება შემცირდეს ის ძალადობის ფაქტები რომელსაც ადგილი აქვს თითქმის ყველა ქვეყანაში ქალების მიმართ“, - განაცხადა გენდერული თანასწორობის საბჭოს წევრმა.



ფორუმზე ხაზგასმით აღინიშნა, რომ პოლიტიკაში ქალთა თანაბარი ჩართულობისთვის განსაკუთრებული მნიშვნელობა აქვს ქვეყნის ლიდერის პოზიციას. ასევე, ყურადღება გამახვილდა იმ გარემოებაზე, რომ ქალთა მონაწილეობა პოლიტიკაში თავის მხრივ, განპირობებულია იმაზე თუ რამდენადაა წარმოდგენილი ქალები ეკონომიკაში. ღონისძიების მსვლელობისას, აღნიშნა რომ ერთ-ერთი მთავარი ქალთა პოლიტიკური მონაწილეობის გაძლიერებისთვის არის გენდერული განათლების დაწყება ჯერ კიდევ სკოლამდელი ასაკიდან, რადგანაც ის სტერეოტიპები, რაც არსებობს ქალისა და კაცის როლის შესახებ თითქმის ყველა საზოგადოებაში, საკმაოდ ხელისშემშლელია აქტიური პოლიტიკური მონაწილეობისათვის.