საქართველოს საგარეო საქმეთა მინისტრის მოადგილემ, ლაშა დარსალიამ თურქმენეთის დამოუკიდებლობის დღისადმი მიძღვნილ საზეიმო მიღებაში მონაწილეობა მიიღო.

საგარეო საქმეთა სამინისტროს პრესსამსახურის ცნობით, ლაშა დარსალიამ მოწვეულ სტუმრების მისასალმებელი სიტყვით მიმართა და თურქმენ ხალხს სადღესასწაულო თარიღი მიულოცა. მან საქართველოსა და თურქმენეთს შორის არსებულ მჭიდრო მეგობრულ ურთიერთობებს და ურთიერთობების გაღრმავების პერსპექტივებს გაუსვა ხაზი.

„საქართველო ყოველთვის იყო და იქნება თურქმენეთის საიმედო მეგობარი, ისევე როგორც ჩვენ არ დაგვავიწყდება თურქმენეთის ღირებული მხარდაჭერა ჩვენი ქვეყნის განვითარების რთულ და მნიშვნელოვან ეტაპებზე. საქართველოს და თურქმენეთს შორის ორმხრივი თანამშროლობა ყველა მიმართულებით ვითარდება - იზრდება ორმხრივი ვაჭრობა, ტურისტების ნაკადი, სატრანსპორტო გადაზიდვების მოცულობა, ასევე მჭიდროა პოლიტიკური თანამშრომლობა,“ - განაცხადა მინისტრის მოადგილემ.

ლაშა დარსალიამ ასევე, ორ ქვეყანას შორის მრავალმხრივ ფორმატებში ურთიერთობების გაღრმავების პერსპექტივებზე ისაუბრა, მათ შორის საერთაშორისო სატრანსპორტო დერეფნის განვითარების მიმართულებით.

საზეიმო მიღება, საქართველოში თურქმენეთის საელჩოს ორგანიზებით, თბილისის საკრებულოში გაიმართა.