საპარლამენტო უმრავლესობის ერთ-ერთი ლიდერი ნუგზარ წიკლაური კოალიცია „ქართული ოცნების” ლიდერს ბიძინა ივანიშვილს ურჩევს საკუთარ სურვილებში ჩამოყალიბდეს.

ამის შესახებ წიკლაურმა დღეს, პარლამენტის რიგგარეშე სესიაზე საბიუჯეტო ცვლილებების განხილვისას განაცხადა.

„ივანიშვილის რამდენიმე ადვოკატმა თქვა, ხომ გადავრიცხეთ ჯარიმის ფული და ახლა ბანკი და ის ქონება დავიბრუნეთ, რომელიც დაყადაღებულიაო. ჩამოყალიბდით ბატონებო, ეს ფული ან იმისთვის გინდოდეთ, რომ ვითომ კახეთში დაზარალებულ გლეხებს დაეხმაროთ ან იმ ქონების დასაბრუნებლად, რომელიც სახელმწიფოს მიერ სამართლიანად არის დაყადაღებული“ - განაცხადა დეპუტატმა.

ამასთან, მმართველი პარტიის წევრი იმ ოპოზიციონერ დეპუტატებს გამოეხმაურა, რომლებმაც სტიქიის შედეგად დაზარალებული გლეხებისთვის დახმარების გაზრდა მოითხოვეს და აღნიშნა, რომ მათი მოთხოვნები არსებულ რეალობას არ შეესაბამება.

„აქ ითქვა, რომ მოდით ეს დახმარება ორჯერ გავზარდოთო, ერთ-ერთმა
თქვა, არა ორჯერ, არამედ სამჯერო. აი სწორედ ეს არის უპასუხისმგებლობა, არ გაქვთ იმის განცდა, რამდენად შეესაბამება რეალობას თქვენი ნათქვამი. სწორედ ამიტომ არის თქვენი პოლიტიკური სახე ასეთი, თუმცა, ქარავანი მიდის, ამ ანდაზის დასასრული კი თქვენც მოგეხსენებათ“ - მიმართა ოპოზიციას წიკლაურმა.

რაც შეეხება სარეზერვო ფონდების დანახარჯებს, წიკლაურის თქმით, ზოგიერთი ადამიანის სულიერი და გონებრივი აღნაგობა შესაძლებელს ხდის ფონდის დანახარჯები მხოლოდ ტაშფანდურებად და დუდუკებად მოიხსენიოს. თუმცა, სინამდვილეში ეს მორაგბეებისთვის, ფეხბურთელებისთვის და სხვა სპორტსმენებისთვის, ასევე საგზაო, წყალმომარაგებისა და სხვა ინფრასტრუქტურული პროექტებისთვის გაღებული ხარჯებია.