„აღმოსავლეთ პარტნიორობა მომავალ წელს დაფუძნებიდან 10 წლისთავს აღნიშნავს. დღევანდელი მინისტერიალი იქნება ერთგვარი გააზრება იმისა, თუ ამ 10 წლის განმავლობაში რა გაკეთდა აღმოსავლეთ პარტნიორი ქვეყნების ევროპაში ინტეგრაციის გზაზე. უნდა აღინიშნოს, რომ საქართველო აღიარებულია, როგორც ლიდერი ქვეყანა, რომელსაც ამ მიმართულებით ძალიან სერიოზული ხელშესახები პროგრესი აქვს,“ - განაცხადა საქართველოს საგარეო საქმეთა მინისტმა, დავით ზალკალიანმა, რომელიც ლუქსემბურგში დღეს დაგეგმილ ,,აღმოსავლეთ პარტნიორობის’’ საგარეო საქმეთა მინისტერიალში მიიღებს მონაწილეობას.

საგარეო საქმეთა სამინისტროს პრესსამსახურის ცნობით, მინისტრის განცხადებით, საქართველოს უკვე აქვს ხელმოწერილი ასოცირების შეთანხმება, ღრმა და ყოვლისმომცველი თავისუფალი ვაჭრობის ჩათვლით, ასევე მოქმედებს ევროკავშირთან თავისუფალი სავიზო მიმოსვლა, თუმცა ქვეყანას ძალიან ამბიციური გეგმები გააჩნია, იმისათვის რომ ევროკავშირთან ინტეგრაციის გზაზე კიდევ უფრო ღრმად წავიდეს. ამ კუთხით, მინისტრმა ყურადღება გაამახვილა საგზაო რუკაზე (ROADMAP2EU), რომელიც ხელს შეუწყობს საქართველოს მომზადებას ევროკავშირში სრულფასოვანი ინტეგრაციისთვის.

„აღნიშნულ შეხვედრას გამოვიყენებთ სწორედ იმისთვის, რომ ვისაუბროთ ამ თემებზე და ასევე მომავალ პერსპექტივებზე. ჩვენი ევროპელი პარტნიორების მხრიდან ძალიან მკაფიო მხარდაჭერა გვაქვს, რაც არაერთხელ იქნა გამოხატული როგორც საჯარო დეკლარაციებში, ისე კონკრეტული საქმიანობითაც,“ - აღნიშნა მინისტრმა.

დავით ზალკალიანის განცხადებით, ერთი კონკრეტული მაგალითი, რომელიც აღმოსავლეთ პარტნიორობის ბრიუსელის სამიტის გადაწყვეტილების შედეგად - 20 შედეგი 2020-სთივს მივიღეთ, გახლავთ საქართველოში აღმოსავლეთ პარტნიორობის ევროპული სკოლის გახსნა, რაც ძალიან მნიშვნელოვანი ნაბიჯია ქვეყნის ევროპული ინტეგრაციის გზაზე.

მინისტრის განცხადებით, ხელშესახები შედეგების წარმოჩენის კუთხით მუშაობა მომავალშიც აქტიურად გაგრძელდება.