საგარეო საქმეთა მინისტრის მოადგილე, ხათუნა თოთლაძე ევროპის საბჭოს გენერალური მდივნის მოადგილეს, გაბრიელა ბატაინი დრაგონს შეხვდა.

საგარეო საქმეთა სამინისტროს პრესსამსახურის ინფორმაციით, მხარეებმა შეხვედრისას ევროპის საბჭოსთან თანამშრომლობის დღის წესრიგში არსებული საკითხები და ურთიერთობების შემდგომი განვითარების პერსპექტივები განიხილეს. ასევე საქართველოსათვის ევროპის საბჭოს 2016-2019წწ სამოქმედო გეგმის მნიშვნელობას და გეგმით გათვალისწინებული პროექტების შესრულების აუცილებლობაზე, ევროპის საბჭოს მონიტორინგის ორგანოების საქართველოს ოკუპირებულ ტერიტორიებზე შესვლის მნიშვნელობაზე ისაუბრეს.

ქართულმა მხარემ ევროპის საბჭოს გენერალური მდივნის მოადგილეს საქართველოს ოკუპირებულ ტერიტორიებზე არსებული სიტუაციის შესახებ დეტალური ინფორმაცია მიაწოდა.

ევროპის საბჭოს გენერალური მდივნის მოადგილე, გაბრიელა ბატაინი დრაგონი საქართველოს ევროპის საბჭოს სპორტზე პასუხიმგებელ მინისტრთა მე-15 კონფერენციის ფარგლებში ეწვია. ვიზიტის ფარგლებში იგი ორმხრივ შეხვედრებს საქართველოს აღმასრულებელი ხელისუფლების წარმომადგენლებთან მართავს.