საპარლამენტო ფრაქცია „ერთობა სამართლიანობისთვის“ წევრის გია ცაგარეიშვილის განცხადებით, ივანიშვილმა საბიუჯეტო ანგარიშზე ზუსტად იმ ოდენობის თანხა ჩარიცხა,  რომელიც სახელმწიფომ ბიუჯეტიდან სტიქიით დაზარალებული კახეთისთვის უნდა გამოყოს.

ცაგარეიშვილის თქმით, ივანიშვილის მიერ გადარიცხული 80 მილიონის ხარჯვა მკაცრად გაკონტროლდება და იმ შემთხვევაში, თუ ის სტიქიით დაზარალებულ მოსახლეობას არ მოხმარდება, ამის შესახებ მოსახლეობას ეცნობება.

„ფულს სუნი არ აქვს, ეს იქნება ივანიშვილის ფული თუ სააკაშვილის, მთავარია მოსახლეობას დაეხმარონ. წინააღმდეგ შემთხვევაში, ყველა მიხვდება, რომ სააკაშვილმა ეს 80 მილიონიც ისე ჩაიდო ჯიბეში, როგორც სარეზერვო ფონდების ფული“ - აღნიშნა დეპუტატმა.

მისივე თქმით, კოალიციის ლიდერის მიერ გადარიცხული თანხა იძლევა იმის საშუალებას, რომ სტიიქით დაზარალებულ მოსახლეობას კომპენსაციების სახით 3 ათასი ლარი მაინც მისცენ.

კოალიცია „ქართული ოცნების“ ლიდერმა ბიძინა ივანიშვილმა ბიუჯეტში 80 მლნ ლარი გადარიცხა. მისი თქმით, მან სასამართლოს მიერ დაკისრებული ჯარიმა, სტიქიით დაზარალებულთა დასახმარებლად გადაიხადა.