საპარლამენტო უმრავლესობის ერთ–ერთი ლიდერის დავით დარჩიაშვილის განცხადებით, პოლიტიკური კოალიცია „ქართული ოცნების“ ლიდერის ბიძინა ივანიშვილის  მიერ ბიუჯეტში გადარიცხული 80 მილიონი ლარი რაში დაიხარჯება,ამას საქართველოს მთავრობა და პარლამენტი გადაწყვეტენ.
ამის შესახებ დარჩიაშვილმა ივანიშვილის მიერ 80 მილიონი ლარის საბიუჯეტო ანგარიშზე ჩარიცხვის შეფასებისას აღნიშნა.
„ნეტავ, ასეთი გამბედავი განცხადებები თავისი პატრონების მიმართ რუსეთში გაეკეთებინა, დაწყებული 90-იანი წლების დასაწყისიდან, როდესაც მას პირდაპირ ახურინებდნენ „მე–9 არხს“, მაშინ ეთქვა პუტინისთვის ასე“ – აღნიშნა დარჩიაშვილმა.
მისივე თქმით, ივანიშვილი ძალიან მდიდარი, მაგრამ ჩვეულებრივი რიგითი ადამიანია, რომელიც საფრანგეთის მოქალაქეა და მონაწილეობს არჩევნებში, მაგრამ საქართველოს მოქალაქეობა არ აქვს.
„რას გააკონტროლებს და რას გადაიხდის და როგორ დაიხარჯება ეს ყველაფერი, განისაზღვრება სუვერენული, დემოკრატიული საქართველოს მთავრობისა და პარლამენტის გადაწყვეტილებით და არა ივანიშვილის კაპრიზებით. მას ჰქონდა კანონდარღევა და ეს თანხა ბიუჯეტის მუხლების მიხედვით დაიხარჯება, იქნება ეს სოციალური პროგრამები, პენსიები, ხელფასები თუ კონკრეტულად სტიქიის შედეგების ლიკვიდაცია -– ეს არის პარლამენტის და მთავრობის გადასაწყვეტი და არა ივანიშვილის“ – აღნიშნა უმრავლესობის წევრმა.
მისივე თქმით, თუ ივანიშვილს დამატებითი ქველმოქმედების გაწევა სურს, უნდა გაითვალისწინოს საქართველოს კანონმდებლობა პარტიების დაფინანსების შესახებ და დაელაპარაკოს სტიქიის შედეგების სალიკვიდაციო შტაბს.
„საერთოდ, კარგი იქნება გაიხსენოს ამ ადამიანმა, რომ სახელმწიფოში ცხოვრობს და არა ფეოდალურ ტყეში, როგორც რუსეთშია მიჩვეული“ – აღნიშნა დეპუტატმა.
ამასთან, დარჩიაშვილის განცხადებით, იმ შემთხვევაში თუ ივანიშვილს ჯარიმების გადახდის შემდეგ ყველაფერი წესრიგში ექნება, შესაბამისად, „ქართუს“ და „პროგრეს ბანკს“ დადებული ყადაღა მოეხსნება.
კოალიცია "ქართული ოცნების" ლიდერმა ბიძინა ივანიშვილმა სტიქიის შედეგად დაზარალებულთა დასახმარებლად საქართველოს ბიუჯეტში 80 მლნ ლარი გადარიცხა.
როგორც ივანიშვილი სოციალურ ქსელ "ფეისბუქში" თავის ოფიციალურ გვერდზე განთავსებულ ვიდეოჩანაწერში აღნიშნავს, ხელისუფლებამ მას ყველა გზა მოუჭრა და ერთადერთი კანონიერი საშუალება, გასაჭირში მყოფი ადამიანების დასახმარებლად, დაკისრებული ჯარიმის გადახდა დარჩა.
ივანიშვილის თქმით, მან სასამართლოს მიერ მითითებულ ანგარიშზე 80 მლნ ლარი ჩარიცხა.
მისი განცხადებით, თანხა სტიქიის შედეგად დაზარალებულ მოქალაქეთა სრულფასოვანი დახმარებისთვის არის განკუთვნილი და მის ხარჯვაზე "ქართული ოცნება" მკაცრ მონიტორინგს განახორციელებს.