საქართველოს საგარეო საქმეთა მინისტრი, დავით ზალკალიანი დღეს საგარეო უწყების ლევან მიქელაძის სახელობის სასწავლო-კვლევით ინსტიტუტში საქართველოში მოქმედი არასამთავრობო და კვლევითი ორგანიზაციების წარმომადგენლებთან შეხვედრას გამართავს, რომელთაც ევროკავშირში ინტეგრაციის საგზაო რუკის (ROADMAP2EU)კონცეფციას და დოკუმენტის შემუშავების მიზნით მინდინარე საქმიანობას გააცნობს.

საგარეო საქმეთა სამინისტროს პრესსამსახურის ცნობით, დოკუმენტი საქართველოს მთავრობის ინიციატივას წარმოადგენს და ევროკავშირთან თანამშრომლობის ყველა არსებული მექანიზმისა და რეფორმების კონსოლიდაციას ემსახურება. საგზაო რუკის იმპლემენტაცია ასოცირების შეთანხმების მიღმა არსებული ინტეგრაციის შესაძლებლობების გამოვლენასა და შესაბამისი ნაბიჯების დაგეგმვას შეუწყობს ხელს.

სამინისტროში დაგეგმილი შეხვედრა დოკუმენტის ირგვლივ არასამთავრობო და კვლევითი ორგანიზაციების მოსაზრებებისა და რეკომენდაციების გაზიარებას ემსახურება. საქართველო-ევროკავშირის ურთიერთობები ბოლო წლების განმავლობაში საკმაოდ დინამიურად ვითარდება. ევროკავშირის სხვადასხვა ინსტიტუციების მიერ საქართველოს მხრიდან ევროპული ინტეგრაციის მიმართულებით გადადგმულ ნაბიჯებს და მთელი რიგი მიმართულებებით მიღწეული პროგრესს მაღალი შეფასება ეძლევა.