რომში ეუთო-ს მონაწილე ქვეყნების პოლიტიკურ დირექტორთა შეხვედრა გაიმართა, სადაც მონაწილეობა საქართველოს დელეგაციამ, საგანგებო დავალებათა ელჩის, შალვა ცისკარაშვილის ხელმძღვანელობით მიიღო.

საგარეო საქმეთა სამინისტროს პრესსამსახურის ცნობით, შეხვედრის ფარგლებში მიმდინარე წელს, ეუთო-ს იტალიის თავმჯდომარეობის პრიორიტეტულ მიმართულებებზე, მათ შორის, ეუთო-ს სივრცეში არსებულ კონფლიქტებზე, კარგი მმართველობის გაძლიერებასა და დისკრიმინაციის აღმოფხვრაზე იმსჯელეს. ღონისძიებაზე საგანგებო სესია მიმდინარე წლის დეკემბერში მილანში დაგეგმილ მინისტრთა საბჭოს შეხვედრაზე განსახილველ თემებს დაეთმო.

შეხვედრაზე სიტყვით გამოსვლისას შალვა ცისკარაშვილმა რუსეთ-საქართველოს კონფლიქტსა და მასთან დაკავშირებულ გამოწვევებზე ისაუბრა. მან აღნიშნა რომ 2008 წელს, რუსეთის მხრიდან საქართველოს წინააღმდეგ განხორციელებული სამხედრო აგრესიიდან 10 წლის შემდეგაც, რუსული მხარე საერთაშორისო სამართლის ფუნდამენტური ნორმებისა და ევროკავშირის შუამდგომლობით დადებული 2008 წლის 12 აგვისტოს ცეცხლის შეწყვეტის შესახებ შეთანხმების დარღვევას განაგრძობს. რუსეთს საქართველოს აფხაზეთისა და ცხინვალის რეგიონები ოკუპირებული აქვს და ამ რეგიონების ფაქტობრივი ანექსიისკენ ნაბიჯებს დგამს.

შალვა ცისკარაშვილმა გამოსვლაში ყურადღება ასევე გაამახვილა ოკუპირებულ რეგიონებში შექმნილ მძიმე ჰუმანიტარულ მდგომარეობაზე, სადაც ადამიანის უფლებათა სადამკვირვებლო მექანიზმებს შეღწევის შესაძლებლობა არ აქვთ.

შალვა ცისკარაშვილმა ჟენევის საერთაშორისო მოლაპარაკებებისა და ინციდენტების პრევენციისა და მათზე რეაგირების მექანიზმების ფორმატების მნიშვნელობაზე ისაბრა და ხაზი გაუსვა ეუთო-ს, როგორც თანათავმჯდომარის, როლს ამ ფორმატების ფუნქციონირებაში.

მან, აგრეთვე რუსეთის მიერ უკრაინის სუვერენიტეტისა და ტერიტორიული მთლიანობის ხელყოფის მცდელობაზე ისაუბრა და უკრაინის ტერიტორიული მთლიანობის მიმართ საერთაშორისოდ აღიარებულ საზღვრებში საქართველოს ურყევი მხარდაჭერა დაადასტურა.


გამოსვლისას შალვა ცისკარაშვილმა რუსეთის ფედერაციის მიერ მინსკის შეთანხმებებისა და ევროკავშირის შუამავლობით დადებული 2008 წლის 12 აგვისტოს ცეცხლის შეწყვეტის შესახებ შეთანხმების შესრულების აუცილებლობას ხაზი გაუსვა.

ქართულმა მხარემ აღნიშნა, რომ ეუთო-ს სივრცეში არსებული კონფლიქტები მილანში დაგეგმილ მინისტრთა საბჭოს შეხვედრაზე გამართულ დისკუსიებსა და მის დოკუმენტებში სათანადოდ უნდა აისახოს.