პარლამენტის თავმჯდომარის მოადგილე, თამარ ჩუგოშვილი სასესიო კვირეულის ფარგლებში, ევროსაბჭოში პარლამენტის სახელით ორგანიზებულ საზეიმო მიღებას უმასპინძლებს.

„ევროსაბჭოს საპარლამენტო ასამბლეის ყველა სესიაზე საქართველოს პოპულარიზაციაზე ვმუშაობთ. ვატარებთ ღონისძიებებს, რომელიც საპარლამენტო ასამბლეის წევრს დეპუტატებს აძლევს შესაძლებლობას მეტი გაიგონ საქართველოს, ქართული დამწერლობის, კულტურისა და ისტორიის შესახებ“ - განაცხადა თამარ ჩუგოშვილმა.

მისივე თქმით, ღონისძიება, რომელიც დღეს ევროპის საბჭოში გაიმართება, ქართულ კულტურულ მემკვიდრეობას ეძღვნება.

„ჩვენ გვექნება შესაძლებლობა, რომ ჩვენს ევროპელ კოლეგებს მიღებაზე ვუმასპინძლოთ და გავაცნოთ ჩვენი ქვეყნის ისტორია, ტრადიციები და კულტურა. ბუნებრივია, რომ ასეთი ღონისძიებები ჩვენ გვეხმარება არა მხოლოდ ჩვენი ქვეყნის კულტურის პოპულარიზაციაში, არამედ პოლიტიკურადაც, რათა ევროსაბჭოს წევრ ქვეყნებს, სრული აღქმა ჰქონდეთ, როგორი კულტურის ისტორიის მქონე ქვეყანაზე ვსაუბრობთ და მათ შორის, რა პოლიტიკური გამოწვევის წინაშე დგას ჩვენი ქვეყანა.

მსგავსი ღონისძიებები ჩვენი ქვეყნის მიმართ ზრდის ინტერესს და ვფიქრობ, რომ დღევანდელი მიღებაც კარგი შესაძლებლობა იქნება ამ მიზნის მისაღწევად“ - აღნიშნა პარლამენტის თავმჯდომარის მოადგილემ.