კიევში, რიგით მე-7 ქართული კულტურის ფესტივალი “თბილისობა” საზეიმოდ აღნიშნეს .

მრავალრიცხოვან დამსწრე საზოგადოებას უკრაინაში საქართველოს საგანგებო და სრულუფლებიანმა ელჩმა, გელა დუმბაძემ და ფესტივალის ორგანიზატორმა, ნატალია სკლიარსკაიამ მისასალმებელი სიტყვით მიმართეს.

საგარეო საქმეთა სამინისტროს პრესსამსახურის ცნობით, საქართველოს ელჩმა საკუთარ გამოსვლაშიორი ქვეყნის მჭიდრო და მეგობრულ ურთიერთობებზე ისაუბრა დასაქართველოს ისტორიაზე, მდიდარ კულტურასა და ტრადიციებზე ყურადღება გაამახვილა.


ღონისძიების ფარგლებში მრავალფეროვანი კულტურული პროგრამა იყო წარმოდგენილი. მაყურებლის წინაშე მუსიკალური ანსამბლი “სულიკო” წარსდგა. ასევე, ქართველი დიზაინერის, ეკატერინე ჯავახიშვილის მიერ ეროვნულ მოტივებზე შექმნილი ახალი კოლექციის ჩვენება გაიმართა.


ღონისძიებაში, ასევე მონაწილეობა მიიღეს ქართული დიასპორული ორგანიზაცეიბის ცეკვისა და სიმღერის ანსამბლებმა. უკრაინელი მოქანდაკისა და რეჟისორის, ივანე კავალერიძის სახლ მუზეუმში კი სტუმრებს საშუალება ჰქონდათ საქართველოს ელჩის ფერწერული ნამუშევრების გამოფენა, სახელწოდებით “კიევი. აკრილის დღიური” დაეთვალიერებინათ. თბილისობის ფარგლებში ასევე ფილმის, “ექვთიმე ღვთისკაცი”-ის ჩვენება გაიმართა, რომელსაც თავად ფილმის რეჟისორი, ნიკოლოზ ხომასურიძე დაესწრო.

სტუმრებს შესაძლებლობა ჰქონდათ ქართული ღვინის კომპანიების მიერ ორგანიზებულ დეგუსტაციაში მიეღოთ მონაწილეობა და კიევში მოქმედი ქართული რესტორნების მიერ წარმოდგენლი კერძები დაეგემოვნებინათ.
ანდრეევკის დაღმართზე გამართულმა თბილისობამ ათასობით ადამიანს უმასპინძლა.