ყირგიზეთის დედაქალაქში ეუთოს საპარლამენტო ასამბლეის მე-17 საშემოდგომო სესია გაიხსნა, რომელიც საქართველოს პარლამენტის წევრის, გიგი წერეთლის მისასალმებელი სიტყვით გაიხსნა.

საპარლამენტო ასამბლეის 300-მდე დელეგატს, ასევე, ყირგიზეთის პრეზიდენტი სოორონბაი ჟეენბეკოვი და პარლამენტის სპიკერი, დასტანბეკ დჯუმანბეკოვი მიესალმნენ.

გიგი წერეთელმა სესიაზე საპარლამენტო ასამბლეის საქმიანობა მიმოიხილა და ეუთოს პრინციპების დაცვის ვალდებულებებზე ისაუბრა. როგორც საპარლამენტო ასამბლეის პრეზიდენტმა აღნიშნა, ეუთოსადმი ნდობის შემცირება ორგანიზაციის იმიჯს საფრთხეს უქმნის, გარდა ამისა უარყოფითად მოქმედებს სახელმწიფოებს შორის დიალოგის და სამშვიდობო შეთანხმებების მიღწევის პროცესზე, რომლის მაგალითსაც საქართველოს ოკუპაცია და უკრაინის კონფლიქტი წარმოადგენს.

„ეუთოს გავლენის გაძლიერებისთვის ჩვენ გავაგრძელებთ ახალი გზების ძიებას, რათა საპარლამენტო დიალოგის ფარგლებში მეტი ინკლუზიური მუშაობა წარიმართოს და ქვეყნებს გამოცდილების გაზიარების საშუალება მიეცეთ“, - განაცხადა გიგი წერეთელმა.


პარლამენტის პრესსამსახურის ინფორმაციით, სესიის ფარგლებში საპარლამენტო ფორუმის მონაწილეები სამი დღის განმავლობაში ეუთოს სივრცეში არსებულ გამოწვევებზე, როგორიცაა მიგრაცია, ტერორიზმი, გარემოს დაცვითი ღონისძიებები, ეკონომიკური თანამშრომლობა, რეგიონული უსაფრთხოება და სავაჭრო ურთიერთობების ხელშეწყობა მოხსენებებს გაეცნობიან და დისკუსიას გამართავენ.

სესიის ფარგლებში საკომიტეტო მოსმენების პარალელურად, ყირგიზეთის დედაქალაქში თემაზე - „უსაფრთხოების დიალოგის ხელშეწყობა ცენტრალურ აზიაში და მის ფარგლებს გარეთ“ საპარლამენტო კონფერენცია გაიმართება.